დაკავებულია პირი, რომელიც ტესტებს აყალბებდა

24.03.21 10:15
დაკავებულია პირი, რომელიც  ტესტებს აყალბებდა

ხმაურიანი დაკავება იმერეთში - ფინანსთა სამინისტროს საგამოძიებო სამსახურმა, კორონავირუსის PCR კვლევის უარყოფითი შედეგების ამსახველი ყალბი დოკუმენტების დამზადება - გასაღების ფაქტზე ერთი პირი დააკავა. 

ოფიციალური ინფორმაციით,ბრალდებული ყალბ ცნობებს 200 ლარის სანაცვლოდ გასცემდა.

"გამოძიებით დადგინდა, რომ ბრალდებულმა, ორ დაინტერესებულ პირს, იმერეთის რეგიონში მდებარე ერთ-ერთი სამედიცინო დაწესებულების სახელით, შესაბამისი ლაბორატორიული კვლევის გარეშე, 200 ლარის სანაცვლოდ, დაუმზადა და გადასცა ახალი კორონავირუსის PCR ლაბორატორიული კვლევის უარყოფითი შედეგების ამსახველი დოკუმენტები.

საგამოძიებო მოქმედებების შედეგად ამოღებულია დიდი ოდენობით, წინასწარ ხელმოწერილი და ბეჭდით დამოწმებული შეუვსებელი თაბახის ფურცლები.

გამოძიება მიმდინარეობს საქართველოს სისხლის სამართლის კოდექსის 362-ე მუხლის პირველი და 221-ე მუხლის მე-4 ნაწილებით, რაც სასჯელის სახით ითვალისწინებს თავისუფლების აღკვეთას 4-დან 6 წლამდე ვადით.

გრძელდება შესაბამისი ღონისძიებები, აღნიშნული დანაშაულის ჩადენაში შესაძლო თანამონაწილე სხვა პირების დადგენა-მხილების მიზნით"- აცხადებენ უწყებაში. 

მსგავსი სიახლეები