როგორც The Telegraph წერს, რუსეთში ერთმანეთის მიყოლებით ხდება ხმაურიანი დაკავებები, იდუმალი სიკვდილიანობა და დგება მრავალწლიანი პატიმრობების განაჩენები, რაც ხელისუფლების უმაღლეს ფენების პარალიზებასაც კი იწვევს. 

ბოლო შემთხვევა - ტრანსპორტის ყოფილი მინისტრისა და კურსკის ოლქის ყოფილი გუბერნატორის, რომან სტაროვოიტის თვითმკვლელობა – განსაკუთრებით მძიმედ იქნა აღქმული რუსეთის პოლიტიკურ წრეებში.

„ეს ყველაფერი საშინლად გამოიყურება,“ – ამბობს პრეზიდენტის ადმინისტრაციის ყოფილი თანამშრომელი, რომელიც ანონიმურად დარჩენას ამჯობინებს. „დაკავებები, სიკვდილი, სკანდალები… ადამიანები თვითონ იჭრებიან ხაფანგში.“

7 ივლისს 53 წლის სტაროვოიტმა სიცოცხლე თვითმკვლელობით დაასრულა. იგი გამოძიების ქვეშ იმყოფებოდა მასშტაბური გაფლანგვის საქმეზე. მედიაში გავრცელებული ინფორმაციით, მის ყოფილ მოადგილეს, ალექსეი სმირნოვს, უკვე მიცემული ჰქონდა ჩვენება მის წინააღმდეგ.

ამ ფონზე ძალაუფლების უმაღლეს ეშელონებში შიშის ვაკუუმია შექმნილი. „ყველაზე უცნაური ის არის, რომ პრეზიდენტს არ გამოუთქვამს თანაგრძნობა. პრემიერიც კი დუმს. ეს უკვე სიგნალია,“ – ამბობს იგივე წყარო.

პარალელურად, რუსეთის სასამართლოები უკვე ყოფილ მაღალჩინოსნებსაც კი ათწლეულობით თავისუფლების აღკვეთას უსჯიან. სიკვდილიანობის ყველაზე „პოპულარულ“ ფორმად კი პოლიტიკურ სიმბოლოდ ქცეული ფანჯრებიდან გადმოვარდნა იქცა.

ასე დაიღუპა კომპანიის „ტრანსნეფტის“ ვიცე-პრეზიდენტი ანდრეი ბადალოვი, რომელიც, მედიასაშუალებების ცნობით, ჩამოვარდა საკუთარი ბინის აივნიდან. მილიარდერ კონსტანტინ სტრუკოვის კერძო თვითმფრინავი კი იძულებით დააბრუნეს რუსეთის ტერიტორიაზე, როცა ის ქვეყანის დატოვებას ცდილობდა.

„წესები შეიცვალა,“ – აცხადებს ალექსანდრა პროკოპენკო, კარნეგის ცენტრის ექსპერტი და რუსეთის ცენტრალური ბანკის ყოფილი მრჩეველი. მისი თქმით, „აღარ აქვს მნიშვნელობა, ვინ გიჭერს მხარს – გადარჩებიან არა ძლიერი, არამედ ფრთხილი ადამიანები.“

შინაგანად პარანოიის ტალღა ფესვებს იდებს თავად კრემლშიც. ერთ-ერთი მოქმედი ჩინოვნიკი ამბობს:

„ვცდილობ, თავი შორს დავიჭირო სახიფათო თემებისგან… ყველანი საკუთარ პატარა სამყაროში ვართ ჩაკეტილნი.“

შეგახსენებთ, რომ რომან სტაროვოიტის თვითმკვლელობა 7 ივლისს დადასტურდა – მან თავი ჯილდოდ მიღებული პისტოლეტით მოიკლა. ცნობილია, რომ სიკვდილის წინ რამდენიმე საათით ადრე მან მუშაობის დროს საგანგებო თათბირი ჩაატარა, შემდეგ კი მოულოდნელად გაემგზავრა სახლში.

რამდენიმე დღით ადრე დაიღუპა ასევე "ტრანსნეფტის" მაღალი რანგის მენეჯერი ანდრეი ბადალოვი, რომელიც, მედიასახეების თანახმად, გადმოვარდა მოსკოვის ცათამბჯენიდან. ახლობლების თქმით, მას არ ჰქონია დეპრესიის ნიშნები და თვითმკვლელობაზე არასოდეს უსაუბრია.

ბადალოვი გახდა კიდევ ერთი რუსი ტოპ-მენეჯერი, რომელიც დაიღუპა ან „შემთხვევით“, ან სავარაუდო თვითმკვლელობით. უკვე ათეულობით ასეთ შემთხვევას ითვლიან – მათ შორისაა რამდენიმე "ლუკოილის" მენეჯერიც.