"რუსეთი ომს აჭიანურებს და შესაბამისად, უფრო ძლიერ გლობალურ ზეწოლას იმსახურებს" - ამის შესახებ უკრაინის პრეზიდენტმა, ვოლოდიმირ ზელენსკიმ სოციალურ ქსელში დაწერა. 

მისი თქმით, კიდევ ერთი კვირა დასრულდა ისე, რომ "რუსეთი არ დასთანხმებია მსოფლიოს მრავალრიცხოვან მოთხოვნებს და არ შეუჩერებია მკვლელობები". 

ამასთან, ზელენსკიმ გავრცელებულ პოსტში რუსეთის დანაკარგებზე ისაუბრა და აღნიშნა, რომ უკრაინა ინარჩუნებს პოზიციებს. 

კიდევ ერთი კვირა დასრულდა ისე, რომ რუსეთი არ დათანხმდა მსოფლიოს მრავალრიცხოვან მოთხოვნებს და არ შეაჩერა მკვლელობები. მხოლოდ ბოლო 24 საათის განმავლობაში ფრონტზე 137 საბრძოლო მოქმედება გაიმართა და ეს ყოველდღიურად ხდება. რუსული არმია არ ამცირებს ზეწოლას. არც დანაკარგებს ითვლის. კერძოდ, ჩვენი მხოლოდ ერთი დანაყოფის - დონეცკის რეგიონში 32-ე ცალკეული მექანიზებული ბრიგადის პასუხისმგებლობის არეალში, პოკროვსკის სექტორში - 4-დან 10 აგვისტომდე კვირაში 209 ოკუპანტი იქნა ლიკვიდირებული. და ეს მხოლოდ ჩვენი ერთი ბრიგადის შედეგია.

უკრაინელი მეომრები აქტიურ ზომებს იღებენ, იცავენ პოზიციებს და საომარი მოქმედებების ყველა არეალში - თუნდაც ყველაზე რთულ არეალში - არის შედეგები, რაც უკრაინას სჭირდება. ჩვენ ვინარჩუნებთ ჩვენს პოზიციებს და ყველაფერს ვაკეთებთ ოკუპანტის განადგურების ან განდევნის მიზნით.

იმავე პერიოდში - გასულ კვირას - რუსებმა უკრაინის წინააღმდეგ ათასზე მეტი საჰაერო ბომბი და თითქმის 1400 თავდასხმის დრონი გამოიყენეს. სარაკეტო დარტყმებიც გრძელდება. ჩვენ ვიცავთ ჩვენი ხალხის სიცოცხლეს და ვაძლიერებთ ჩვენს საჰაერო თავდაცვას. ასე გამოიყურება ომში არსებული ვითარება. სიტუაცია დიპლომატიაშიც შესაბამისი უნდა იყოს.

რუსეთი ომს აჭიანურებს და შესაბამისად, უფრო ძლიერ გლობალურ ზეწოლას იმსახურებს. რუსეთი უარს ამბობს მკვლელობების შეჩერებაზე და შესაბამისად, არ უნდა მიიღოს რაიმე ჯილდო ან სარგებელი. ეს არ არის მხოლოდ მორალური პოზიცია – ეს რაციონალური პოზიციაა. დათმობები მკვლელს არ გადაარწმუნებს, სიცოცხლის ჭეშმარიტად ძლიერი დაცვა კი მკვლელებს აჩერებს.

მადლობას ვუხდი მსოფლიოში ყველას, ვინც გვეხმარება ძლიერების შენარჩუნებაში და ვინც ნამდვილ მშვიდობას - ძალით მშვიდობას - აახლოებს. ეს არის ერთადერთი სახის მშვიდობა, რომლის მიღწევაც რუსეთთან ერთად შეიძლება. ჩვენ ამისთვის 24/7 ვმუშაობთ. მადლობას ვუხდი ჩვენს მეომრებს, უკრაინის სახელმწიფო საგანგებო სიტუაციების სამსახურის მაშველებს, ჩვენს სპეცსამსახურებს და ყველა სააგენტოს, რომელიც სიცოცხლის დარაჯად დგას," - წერს ზელენსკი.