ბრიანსკის ოლქში, ნავთობის გადამტან სადგურ „უნეჩაზე“ 21 აგვისტოს დრონებით მორიგი იერიშის შედეგად ხანძარი გაჩნდა, - ამის შესახებ უკრაინის უპილოტო სისტემების ძალების სარდალმა რობერტ „მადიარ“ ბროვდიმ Telegram-ზე განაცხადა. მისი თქმით, ეს უკვე მეორე თავდასხმაა ერთ კვირაში: 13 აგვისტოს განხორციელებული დარტყმის გამო რუსეთმა დროებით შეაჩერა მაგისტრალური ნავთობსადენი „დრუჟბას“ მუშაობა, რის გამოც უნგრეთი რამდენიმე დღის განმავლობაში ნავთობის გარეშე დარჩა.

„უნეჩას“ სადგურს კომპანია "აკ  ტრანსნეფტეპროდუქტი" მართავს. „დრუჟბას“ ნავთობსადენის სიგრძე 8 900 კილომეტრია და ის რამდენიმე ქვეყანას კვეთს.

გარდა ამისა, 18 აგვისტოს ღამით უკრაინულმა დრონებმა ტამბოვის ოლქში მდებარე ნავთობის გადამტან სადგურ „ნიკოლსკოეს“ შეუტიეს, რის შედეგადაც მთლიანად შეჩერდა ნავთობის გადატუმბვა „დრუჟბას“ მაგისტრალზე.