ამერიკის პრეზიდენტმა დონალდ ტრამპმა განაცხადა, რომ თურქეთი, სავარაუდოდ, დაეთანხმება მის მოთხოვნას და შეწყვეტს რუსეთისგან ნავთობის შეძენას. ტრამპის თქმით, მან შეიძლება მოხსნას სანქციები ანკარას მიმართ, რათა თურქეთმა შეძლოს ამერიკული F-35 ტიპის გამანადგურებლების შეძენა.

ტრამპმა ჟურნალისტებს უთხრა, რომ მისი ორსაათიანი მოლაპარაკება თურქ კოლეგასთან, რეჯეფ თაიფ ერდოღანთან, „ძალიან დამაჯერებელი“ იყო სხვადასხვა საკითხზე, თუმცა მეტი დეტალი არ დაუკონკრეტებია და აღნიშნა, რომ ოფიციალური განცხადება მოგვიანებით გაკეთდება.

ტრამპი აქტიურად მოუწოდებს ევროპულ ქვეყნებს, შეწყვიტონ რუსეთის ნავთობის შესყიდვა, სანაცვლოდ კი მზად არის გაამკაცროს სანქციები მოსკოვის წინააღმდეგ, რათა შეამციროს რუსეთის შემოსავლები უკრაინაში ომის დასაფინანსებლად.

კითხვაზე, შეწყვეტს თუ არა თურქეთი რუსეთის ნავთობის ყიდვას, ტრამპი თავდაჯერებულად გამოეხმაურა:

„მე მჯერა, რომ ის შეწყვეტს, დიახ. იცით რატომ? რადგან მას შეუძლია ნავთობი ბევრისგან იყიდოს,“ – აღნიშნა ტრამპმა ერდოღანზე.

ერდოღანი თეთრ სახლში პირველად ექვსწლიანი პაუზის შემდეგ მივიდა, იმ იმედით, რომ ტრამპი მოხსნიდა აშშ-ს სანქციებს და თურქეთს მისცემდა საშუალებას შეეძინა F-35-ები.

ოვალური კაბინეტიდან, ტრამპმა ერდოღანი „ძალიან მაგარ კაცად“ მოიხსენია და აღნიშნა, რომ ისინი მეგობრებად დარჩნენ მაშინაც კი, როცა მისი წინამორბედი ჯო ბაიდენი თურქეთს აშკარად უღობავდა გზას.