რუსული საზოგადოებრივი ჯგუფების ცნობით, ნიჟნი ნოვგოროდის ოლქში, კსტოვოში, "ლუკოილის" ნავთობსაწყობთან და ნავთობქიმიურ ქარხანასთან ახლოს, ღამით დრონებით თავდასხმის შემდეგ, ხანძარი გაჩნდა.

რუსული Telegram არხების ცნობით, 4 ნოემბრის ღამეს, ნიჟნი ნოვგოროდის ოლქში, კსტოვოს მაცხოვრებლებმა აფეთქებების შესახებ განაცხადეს.

Telegram არხი "ასტრა" წერს, რომ  ხანძარი ინდუსტრიული ზონის სამხრეთ-აღმოსავლეთ ნაწილში გაჩნდა, სადაც ორი ნავთობკომპანიაა განთავსებული - "სიბურ-კსტოვო" და "ლუკოილ-ნიჟეგოროდნეფტეორგსინტეზი", ისინი ერთმანეთთან ახლოს მდებარეობს.

"სიბურ-კსტოვოს" ნავთობქიმიური ქარხანა ეთილენს, პროპილენს, ბენზოლს და ნახშირწყალბადების რიგ ფრაქციებს აწარმოებს. ამასთან, უკრაინული მედიის ცნობით, ის ასაფეთქებელ კომპონენტებსაც აწარმოებს.

მედიის ცნობით, "ლუკოილი-ნიჟეგოროდნეფტეორგსინტეზი" რუსეთის ერთ-ერთი წამყვანი ნავთობგადამამუშავებელი ქარხანაა. ის მნიშვნელოვანია მოსკოვის რეგიონის მომარაგებისთვის, რომელიც ქვეყნის ბენზინის მოხმარების დაახლოებით 30%-ს შეადგენს. ნიჟნი ნოვგოროდის ნავთობგადამამუშავებელი ქარხნიდან ბენზინი მოსკოვს მილსადენით მიეწოდებოდა. ქარხნის დადგმული პირველადი ნავთობგადამამუშავებელი სიმძლავრე წელიწადში დაახლოებით 17 მილიონი ტონაა. კომპანია 50-ზე მეტ სხვადასხვა პროდუქტს აწარმოებს, მათ შორის საავტომობილო, საავიაციო და დიზელის საწვავს, ასევე ნაფთენურ ბიტუმებს, პარაფინებს და სხვა მსგავს პროდუქტებს.