უკრაინის დასავლეთით, ქალაქ ტერნოპილში ორ საცხოვრებელ კორპუსზე რუსული რაკეტებითა და დრონებით განხორციელებული თავდასხმის შედეგად, სულ მცირე 26 ადამიანი დაიღუპა, მათ შორის სამი ბავშვი. ასევე, თავდასხმის შედეგად 93 ადამიანი დაშავდა, მათ შორის 18 ბავშვი. ინფორმაციას უკრაინის ოფიციალური პირები ავრცელებენ. 

უკრაინის საჰაერო ძალების განცხადებით, საცხოვრებელ ბინებს რუსული X-101 ფრთოსანი რაკეტები მოხვდა. 

რუსეთმა ლვოვისა და ივანო-ფრანკოვსკის რეგიონებიც დაბომბა, ამასთან ჩრდილო-აღმოსავლეთ ქალაქ ხარკოვის სამ რაიონზე დრონებით განხორციელებული თავდასხმის შედეგად 30-ზე მეტი ადამიანი დაშავდა. 

უკრაინის საჰაერო ძალების ინფორმაციით, რუსეთის მიერ გაშვებული 476 დრონიდან 442 და 48 რაკეტიდან 41 ჩამოაგდეს, მათ შორის 10 რაკეტა, რომლებიც კიევს დასავლელი მოკავშირეების მიერ მიწოდებული F-16 და Mirage 2000 გამანადგურებლებით გაანადგურეს.

საჰაერო ძალებმა დასავლელი პარტნიორებისგან საავიაციო იარაღის "შეუფერხებელი და დროული" მიწოდება მოითხოვეს.