ფლორიდაში აშშ-სა და უკრაინის დელეგაციების შეხვედრაზე მხარეები სამშვიდობო პროექტზე ვერ შეთანხმდნენ. როგორც РБК-Украина იტყობინება, ყველაზე დიდი უთანხმოება ტერიტორიულ საკითხებსა და უკრაინის შესაძლო NATO-ს წევრობას შეეხებოდა.

წყაროს თქმით, მოლაპარაკებები ახლა „ჟენევის ჩარჩოს“ მიღმა, ყველაზე პრობლემურ საკითხებზეა გადატანილი. აშშ პროცესში მედიატორის როლს ასრულებს და რუსული მხარის პოზიციებს გადასცემს. მოსკოვი უკრაინის ძალების დონბასიდან სრულ გაყვანას მოითხოვს, რასაც კიევი „კონსტიტუციური შეზღუდვებისა და რეალური სამხედრო ვითარების“ გამო არამიზანშეწონილს უწოდებს.

უკრაინის მოთხოვნა უცვლელია: ტერიტორიების შესახებ დისკუსია უნდა დაიწყოს არსებული ფრონტის ხაზიდან, და არა რუსეთის ულტიმატუმით.

კიევი ასევე ხაზს უსვამს, რომ NATO-ში გაწევრიანების კურსი კონსტიტუციაშია დაფიქსირებული, და მისი შეცვლა „საშიშ პრეცედენტს“ შექმნის. უკრაინა აცხადებს, რომ რუსეთს ვეტო ვერ ექნება ქვეყნის NATO-ში შესვლაზე.

აშშ-ის დელეგაცია მზადაა მოუსმინოს უკრაინის არგუმენტებს, თუმცა რთულ რეალობას აღწერს:

„შეგიძლიათ 100% მართალი იყოთ, მაგრამ თუ მეორე მხარე ამბობს ‘არას’ — რა უნდა გავაკეთოთ?“