უკრაინის პრეზიდენტი ვოლოდიმირ ზელენსკი ადასტურებს, რომ მონაწილეობას მიიღებს ბერლინში დაგეგმილ მოლაპარაკებებში, რომლებიც რუსეთის მიერ წარმოებული ომის დასრულებას შეეხება.

ზელენსკის თქმით, უახლოეს დღეებში დაგეგმილია შეხვედრები აშშ-ის წარმომადგენლებთან და ევროპელ პარტნიორებთან, ხოლო ბერლინში „ბევრი ღონისძიება“ გაიმართება. გავრცელებული ინფორმაციით, ორშაბათს, 15 დეკემბერს, იგი გერმანიის კანცლერ ფრიდრიხ მერცს შეხვდება უკრაინის ეკონომიკის საკითხებზე; ჯერჯერობით უცნობია, ჩავა თუ არა ზელენსკი ბერლინში კვირას, 14 დეკემბერს, აშშ-ის წარმომადგენელ სტივ უიტკოფთან შესახვედრად.

ზელენსკი აცხადებს, რომ კიევი ამზადებს უსაფრთხოების გარანტიების დეტალებს, რომლებიც „სამართლიან მშვიდობას“ უნდა დაეფუძნოს და გამორიცხოს რუსეთის განმეორებითი შეჭრა. მისივე თქმით, უკრაინის პოზიცია მოლაპარაკებებში „ძლიერია“ - ფრონტზე მდგომარეობის, იარაღის წარმოებისა და შიდა სტაბილურობის გამო.

"მოლაპარაკებებაში ჩვენი, უკრაინული პოზიცია ძლიერია, რადგან ჩვენ ვინარჩუნებთ პოზიციებს ფრონტზე, იარაღის მრეწველობასა და შიდა სტაბილურობაში" - ამბობს ზელენსკი.

ბერლინში ასევე იგეგმება უკრაინის აღდგენის საკითხზე კონსულტაციებიც აშშ-ისა და ევროპელი პარტნიორების მონაწილეობით.