უკრაინის გენერალურმა შტაბმა განაცხადა, რომ უკრაინის შეიარაღებულმა ძალებმა კასპიის ზღვაში რუსულ ნავთობის საბურღ პლატფორმებს დაარტყეს. 

უწყების ინფორმაციით, დარტყმა განხორციელდა რუსეთის ერთ-ერთი უმსხვილესი ნავთობკომპანიის, „ლუკოილის“, კუთვნილ სამ საბურღ პლატფორმაზე - „ვ. ფილანოვსკი“, „იური კორჩაგინი“ და „ვალერი გრაიფერი“.

გენშტაბში ამბობენ, რომ ჩამოთვლილი ობიექტები ნავთობისა და გაზის მოპოვების პარალელურად რუსეთის არმიას უკრაინის წინააღმდეგ ომში ლოგისტიკურ მხარდაჭერას უწევენ.

უკრაინულმა ძალებმა ასევე გაანადგურეს რუსული Buk-M3 ტიპის საზენიტო-სარაკეტო სისტემა ლუგანსკის ოლქის ოკუპირებულ ნაწილში. დაარტყეს რუსეთის 49-ე გაერთიანებული არმიის მატერიალურ-ტექნიკური უზრუნველყოფის საწყობს.