აშშ-ის პრეზიდენტი დონალდ ტრამპი ირანში შესაძლო სამხედრო მოქმედებების რამდენიმე ვარიანტს განიხილავს. მისი თქმით, ვითარებას თვალყურს ყოველწამიერად ადევნებს. 

როგორც ჩანს, არიან ადამიანები, რომლებიც დახოცეს და არ უნდა დაეხოცათ. ესენი არიან მოძალადეები. თუ მათ ლიდერებს ვუწოდებთ, არ ვიცი, შეიძლება თუ არა ლიდერების დარქმევა. ისინი ძალადობის საშუალებით მართავენ. ჩვენ ამას ძალიან სერიოზულად განვიხილავთ. სამხედროები ამას განიხილავენ. ჩვენ ძალიან ძლიერ ვარიანტებს განვიხილავთ. გადაწყვეტილებას მივიღებთ. ინფორმაციას ყოველ საათს მაწვდიან.

რაც შეეხება ბირთვულ შეთანხმებას, ირანის ლიდერებმა გუშინ დაგვირეკეს და  შემოგვთავაზეს მოლაპარაკება. შეიძლება შევხვდეთ, აორგანიზებენ ამას. მაგრამ შეიძლება ამ შეხვედრამდე მოგვიწიოს ნაბიჯების გადადგმა იმის გამო რაც ხდება, თუმცა შეხვედრა მზადდება"- უთხრა ტრამპმა ჟურნალისტებს კვირას, პრეზიდენტის თვითმფრინავის ბორტზე.

ოფიციალური პირების თქმით, პრეზიდენტს შესთავაზეს რამდენიმე ვარიანტი, რომლებიც ძირითადად თეირანის უსაფრთხოების ძალების განადგურებაზეა მიმართული - იმ ძალების, რომლებიც პროტესტის ჩახშობაში გამოიყენება. ეს სცენარები მოიცავს კიბერშეტევებს ირანის სამხედროებზე ან რეჟიმის სამიზნეებზე, რამაც შესაძლოა პროტესტის ჩახშობის მცდელობა შეაფერხოს.

ასევე განიხილება ახალი სანქციების დაწესება რეჟიმის წარმომადგენლებისა და ირანის ეკონომიკის ცალკეული სექტორების წინააღმდეგ, მათ შორის ენერგეტიკისა და საბანკო სექტორის მიმართ.

როგორც CNN წერს, Human Rights Activists News Agency-ის მონაცემებით, ირანში არეულობების დროს სულ მცირე 544 ადამიანი დაიღუპა. მსხვერპლის უმრავლესობა მოკლულია საბრძოლო ტყვიებით ან თოფის საფანტით, უმეტესად ახლო დისტანციიდან. სააგენტოს ცნობით, მიღებულია კიდევ 579 შეტყობინება სიკვდილის შემთხვევებზე, რომლებიც ჯერ კიდევ გამოძიების საგანია, რის შედეგადაც დაღუპულთა საერთო რაოდენობა 1 123-მდე იზრდება. ამასთან, დაკავებულია სულ მცირე 10 675 ადამიანი, მათ შორის 169 ბავშვი.