"ირანი იქნება პასუხისმგებლიანი პარტნიორი გლობალურ უსაფრთხოებაში" - ირანის შაჰის დინასტიის მემკვიდრე, რეზა ფეჰლევი სოციალურ ქსელში წერს, თუ როგორი იქნება ირანი ისლამური რესპუბლიკის დაცემის შემთხვევაში. 

რეზა ფეჰლევის განცხადებით, საპროტესტო მოძრაობის გამარჯვების შემთხვევაში, უსაფრთხოებისა და საგარეო პოლიტიკის სფეროში ირანის ბირთვული სამხედრო პროგრამა დასრულდება. ტერორისტული დაჯგუფებების მხარდაჭერა დაუყოვნებლივ შეწყდება. თავისუფალი ირანი იმუშავებს რეგიონულ და გლობალურ პარტნიორებთან ტერორიზმის, ორგანიზებული დანაშაულის, ნარკოტიკებით ვაჭრობისა და ექსტრემისტული ისლამიზმის წინააღმდეგ საბრძოლველად.

მსოფლიოს ყველა ჩვენს მეგობარს,

ისლამური რესპუბლიკის უღელის ქვეშ მყოფი ირანი თქვენს გონებაში ტერორიზმთან, ექსტრემიზმთან და სიღარიბესთან ასოცირდება. ნამდვილი ირანი სხვა ირანია. ლამაზი, მშვიდობისმოყვარე და აყვავებული ირანი.

ეს არის ირანი, რომელიც ისლამურ რესპუბლიკამდე არსებობდა და სწორედ ეს ირანი აღდგება ფერფლიდან ისლამური რესპუბლიკის დაცემის დღეს.

ამიტომ, მინდა ნათლად განვაცხადო, თუ როგორ მოიქცევა თავისუფალი ირანი მეზობლებისა და მსოფლიოს მიმართ ამ რეჟიმის დაცემის შემდეგ.

უსაფრთხოებისა და საგარეო პოლიტიკის სფეროში ირანის ბირთვული სამხედრო პროგრამა დასრულდება. ტერორისტული დაჯგუფებების მხარდაჭერა დაუყოვნებლივ შეწყდება. თავისუფალი ირანი იმუშავებს რეგიონულ და გლობალურ პარტნიორებთან ტერორიზმის, ორგანიზებული დანაშაულის, ნარკოტიკებით ვაჭრობისა და ექსტრემისტული ისლამიზმის წინააღმდეგ საბრძოლველად.

ირანი იმოქმედებს როგორც მეგობარი და სტაბილიზატორი ძალა რეგიონში. და ის იქნება პასუხისმგებლიანი პარტნიორი გლობალურ უსაფრთხოებაში.

დიპლომატიაში შეერთებულ შტატებთან ურთიერთობები ნორმალიზდება და ჩვენი მეგობრობა ამერიკასთან და მის ხალხთან აღდგება. ისრაელის სახელმწიფო დაუყოვნებლივ იქნება აღიარებული. ჩვენ გავაგრძელებთ აბრაამის შეთანხმებების კიროსის შეთანხმებებად გაფართოებას, რაც თავისუფალ ირანს, ისრაელსა და არაბულ სამყაროს გააერთიანებს.

დაიწყება ახალი თავი, რომელიც დაფუძნებული იქნება ურთიერთაღიარებაზე, სუვერენიტეტსა და ეროვნულ ინტერესებზე.

ენერგეტიკის სფეროში ირანს მსოფლიოში ნავთობისა და გაზის ერთ-ერთი უდიდესი მარაგი აქვს. თავისუფალი ირანი თავისუფალი სამყაროსთვის საიმედო ენერგომომწოდებელი გახდება. პოლიტიკის შემუშავება გამჭვირვალე იქნება. ირანის ქმედებები პასუხისმგებლიანი იქნება. ფასები პროგნოზირებადი იქნება.

გამჭვირვალობისა და მმართველობის თვალსაზრისით ირანი მიიღებს და აღასრულებს საერთაშორისო სტანდარტებს. ფულის გათეთრებას დაუპირისპირდება. ორგანიზებული კორუფცია დაიშლება. საჯარო ინსტიტუტები ხალხის წინაშე იქნებიან ანგარიშვალდებულნი.

ეკონომიკის მხრივ, ირანი მსოფლიოში ერთ-ერთი ბოლო დიდი, გამოუყენებელი ბაზარია. ჩვენი მოსახლეობა განათლებულია, თანამედროვეა, დიასპორით, რომელიც მას მსოფლიოს ოთხივე კუთხესთან აკავშირებს. დემოკრატიული ირანი თავის ეკონომიკას ვაჭრობისთვის, ინვესტიციებისა და ინოვაციებისთვის გახსნის. ირანი კი მსოფლიოში ინვესტიციების განხორციელებას შეეცდება.

შესაძლებლობა იზოლაციას ჩაანაცვლებს.

ეს არ არის აბსტრაქტული ხედვა. ეს პრაქტიკული ხედვაა. დაფუძნებულია ეროვნულ ინტერესებზე, სტაბილურობასა და თანამშრომლობაზე. ამის მისაღწევად, ახლა დროა, ირანელ ხალხს გვერდით დავუდგეთ. ისლამური რესპუბლიკის დაცემა და ირანში სეკულარული, დემოკრატიული მთავრობის დამყარება არა მხოლოდ ჩემი ხალხის ღირსებას აღადგენს, არამედ რეგიონსა და მსოფლიოსთვის სასარგებლო იქნება.

თავისუფალი ირანი მშვიდობისთვის. კეთილდღეობისთვის. და პარტნიორობისთვის ძალა იქნება," - წერს ირანის უკანასკნელი შაჰის ვაჟი, რეზა ფეჰლევი.