Axios: პუტინსა და ზელენსკის შორის პირადი შეხვედრა შესაძლოა მალე შედგეს
ამერიკელი ოფიციალური პირები, რომლებიც აბუ-დაბიში გამართულ სამმხრივ მოლაპარაკებებში იყვნენ ჩართული, მიიჩნევენ, რომ უკრაინის პრეზიდენტ ვოლოდიმირ ზელენსკისა და რუსეთის დიქტატორ ვლადიმირ პუტინს შორის პირადი შეხვედრის რეალური შესაძლებლობა გაჩნდა. ამის შესახებ წერს Axios-ი, თუმცა წყაროს ვინაობას არ ასახელებს.
„ჩვენ ძალიან ახლოს ვართ პუტინსა და ზელენსკის შორის შეხვედრასთან“, — განაცხადა ანონიმურმა ამერიკელმა ოფიციალურმა პირმა შაბათს, არაბთა გაერთიანებულ საამიროებში გამართული მოლაპარაკებების კომენტირებისას.
მისივე თქმით, თუ აბუ-დაბიში დაგეგმილი სამმხრივი მოლაპარაკებების მომდევნო რაუნდი წარმატებით ჩაივლის, შესაძლოა გაიხსნას მხარეების შეხვედრების შესაძლებლობა მოსკოვში ან კიევში.
„ჩვენ ვფიქრობთ, რომ ასეთი შეხვედრები ლიდერების შეხვედრამდე უნდა შედგეს. არ გვგონია, რომ ეს შორს არის. თუ ამ გზას გავაგრძელებთ, ამას აუცილებლად მივაღწევთ“, — განაცხადა ოფიციალურმა პირმა.
