რუსეთის დროშით მცურავ გათხევადებული ბუნებრივი გაზის (LNG) ტანკერზე Arctic Metagaz ხმელთაშუა ზღვაში ხანძარი გაჩნდა. ამის შესახებ სააგენტო Reuters საზღვაო უსაფრთხოების წყაროებზე დაყრდნობით წერს.

გემი, რომელიც აშშ-ისა და დიდი ბრიტანეთის სანქციების ქვეშაა, ბოლოს დაფიქსირდა მალტის სანაპიროსთან, გემების მონიტორინგის პლატფორმა MarineTraffic-ის მონაცემებით.

მალტის შეიარაღებული ძალების ინფორმაციით, მათ მიიღეს საგანგებო სიგნალი ტანკერიდან და მოგვიანებით ეკიპაჟის წევრები სამაშველო ნავში იპოვეს ლიბიის საძიებო-სამაშველო ზონაში.

წყაროების ნაწილი ვარაუდობს, რომ ხანძარი შესაძლოა საზღვაო სამხედრო დრონის თავდასხმას უკავშირდებოდეს, თუმცა ეს ინფორმაცია ოფიციალურად არ დადასტურებულა.

რუსული გემის ოპერატორმა SMP Techmanagement-მა, გაზის მწარმოებელმა Novatek-მა და რუსეთის ტრანსპორტის სამინისტრომ ინციდენტთან დაკავშირებით კომენტარი ჯერჯერობით არ გააკეთეს.

უკრაინის უსაფრთხოების სამსახურსაც ამ ეტაპზე ოფიციალური განცხადება არ გაუვრცელებია.