უკრაინის პრეზიდენტმა, ვოლოდიმირ ზელენსკიმ ახლო აღმოსავლეთსა და სპარსეთის ყურის რეგიონში არსებულ ვითარებაზე შეხვედრა გამართა. ამის შესახებ ის სოციალურ ქსელში წერს. 

მისი თქმით, უკრაინა კონსულტაციებს მართავს ევროპასა და შეერთებულ შტატებში პარტნიორებთან, ასევე ირანის მეზობელ ქვეყნებთან. გუშინ ესაუბრა არაბთა გაერთიანებული საამიროების და კატარის ლიდერებს. დღეს კი მოლაპარაკებები გამართა იორდანიისა და ბაჰრეინის ლიდერებთან.ასევე გაიმართება მოლაპარაკებები ქუვეითთან და რეგიონის სხვა ქვეყნებთან.

ვოლოდიმირ ზელენსკის ცნობით, უკრაინა ახლო აღმოსავლეთში ექსპერტთა ჯგუფს გაგზავნის.

მე შეხვედრა ჩავატარე ახლო აღმოსავლეთსა და სპარსეთის ყურის რეგიონში არსებულ ვითარებაზე - უკრაინისა და ჩვენი პარტნიორების წინაშე არსებულ გამოწვევებზე, ასევე ჩვენს შესაძლებლობებზე, დავიცვათ სიცოცხლე, თავიდან ავიცილოთ ომის გაფართოება და სტაბილიზაცია გავუკეთოთ გლობალურ ბაზრებს.

ირანის რეჟიმი, რომელიც ნებისმიერ ფასად ცდილობს გადარჩენას, აშკარა საფრთხეს უქმნის რეგიონის ყველა სახელმწიფოს და გლობალურ სტაბილურობას. ირანთან ახლოს მდებარე არცერთ ქვეყანას არ შეუძლია თავი უსაფრთხოდ იგრძნოს. ორმუზის სრუტეში გადაზიდვები პრაქტიკულად შეჩერებულია. ჯერჯერობით, ირანის რეჟიმს არ გამოუჩენია გულწრფელი დიპლომატიის ან ფუნდამენტური ცვლილებების გულწრფელი განზრახვა.

უკრაინა კონსულტაციებს მართავს ევროპასა და შეერთებულ შტატებში პარტნიორებთან, ასევე ირანის მეზობელ ქვეყნებთან. გუშინ ვესაუბრე არაბთა გაერთიანებული საამიროების და კატარის ლიდერებს. დღეს კი მოლაპარაკებები გავმართე იორდანიისა და ბაჰრეინის ლიდერებთან. ასევე გაიმართება მოლაპარაკებები ქუვეითთან და რეგიონის სხვა ქვეყნებთან. ყველა მათგანი სერიოზული გამოწვევის წინაშე დგას და ამაზე ღიად საუბრობს: ირანის თავდასხმის დრონები იგივე „შაჰედებია“, რომლებიც ამ ომის განმავლობაში ურტყამდნენ ჩვენს ქალაქებს, სოფლებს და ჩვენს უკრაინულ ინფრასტრუქტურას.

სულ რამდენიმე დღეში ირანმა 800-ზე მეტი სხვადასხვა ტიპის რაკეტა და 1400-ზე მეტი თავდასხმის დრონი გაუშვა. სწორედ ირანული დრონები და რაკეტები წარმოადგენენ მთავარ საფრთხეს თავისუფალი ნავიგაციისთვის, რაც ნავთობის, ნავთობპროდუქტებისა და გაზის გლობალურ ფასებს დესტაბილიზაციას უქმნის.

უკრაინას შეუძლია წვლილი შეიტანოს სიცოცხლის დაცვასა და სიტუაციის სტაბილიზაციაში. პარტნიორები მოგვმართავენ. მე დავავალე უკრაინის საგარეო საქმეთა მინისტრს, სადაზვერვო სააგენტოებთან, თავდაცვის მინისტრთან, ჩვენს სამხედრო სარდლობასთან და ეროვნული უსაფრთხოებისა და თავდაცვის საბჭოს მდივანთან ერთად, წარმოადგინონ შესაბამისი ქვეყნების დახმარების ვარიანტები და დახმარება ისე გაეწიოთ, რომ არ დაასუსტოს ჩვენივე თავდაცვა უკრაინაში.

ჩვენს სამხედროებს გააჩნიათ საჭირო შესაძლებლობები. უკრაინელი ექსპერტები ადგილზე იმუშავებენ და შესაბამისი ჯგუფები ამ ძალისხმევის კოორდინაციას უკვე ახდენენ. ჩვენ მზად ვართ დავეხმაროთ სიცოცხლის დაცვაში, მშვიდობიანი მოსახლეობის დაცვაში და მხარი დავუჭიროთ რეალურ ძალისხმევას სიტუაციის სტაბილიზაციისა და, კერძოდ, რეგიონში უსაფრთხო ნავიგაციის აღდგენისთვის.

ჩვენ ველით, რომ ევროკავშირი, ევროპული ქვეყნები და დიდი შვიდეული მიიღებენ აქტიურ ზომებს როგორც ირანის რეჟიმის ტერორისტული შესაძლებლობების დემონტაჟში, ასევე რეგიონში სიცოცხლისა და გლობალური სტაბილურობის დაცვაში. ჩვენ გავაგრძელებთ კოორდინაციას ჩვენს პარტნიორებთან. დიდება უკრაინას!" - წერს ზელენსკი.