ირანის ისლამური რევოლუციის გუშაგთა კორპუსი აშშ-ს მკაცრი საპასუხო ნაბიჯებით ემუქრება. კოსმოსური ძალების მეთაურის, სეიედ მაჯიდ მუსავის განცხადებით, თუ ჰორმუზის სრუტის უსაფრთხოებას საფრთხე შეექმნება, თეირანი მზად არის ახლო აღმოსავლეთის რეგიონში ვითარება უკიდურესად გაამწვავოს.

ირანელი სამხედრო მაღალჩინოსნის თქმით, ჰორმუზის სრუტის დაუცველობის შემთხვევაში, პასუხი მთელი ირანის მასშტაბით იქნება კოორდინირებული.

„თუ ჰორმუზის წმინდა სრუტეს საფრთხეს შეუქმნით, რეგიონს ჯოჯოხეთად ვაქცევთ“, — განაცხადა მუსავიმ.

მუქარის შემცველი განცხადება მას შემდეგ გავრცელდა, რაც აშშ-ის ცენტრალურმა სარდლობამ დაადასტურა, რომ ამერიკულმა ძალებმა ირანის ტერიტორიაზე რამდენიმე ობიექტზე იერიში მიიტანეს. ვაშინგტონის ინფორმაციით, ოპერაციის სამიზნე ირანის სამხედრო სადაზვერვო და სათვალთვალო შესაძლებლობები, საკომუნიკაციო ინფრასტრუქტურა და საჰაერო თავდაცვის სისტემები იყო.

რეგიონში დაძაბულობა კვლავ იზრდება, ხოლო ჰორმუზის სრუტე, რომლის გავლითაც მსოფლიო ნავთობის მნიშვნელოვანი ნაწილი გადაიზიდება, საერთაშორისო უსაფრთხოების ერთ-ერთ ყველაზე მგრძნობიარე წერტილად რჩება.