პავლოგრადზე თავდასხმის შედეგად 12 ადამიანი დაშავდა, მათ შორის 13 წლის მოზარდი
რუსეთის მორიგი საჰაერო თავდასხმის სამიზნე დნეპროპეტროვსკის ოლქის ქალაქი პავლოგრადი გახდა. ადგილობრივი ხელისუფლების ინფორმაციით, იერიშის შედეგად დაზიანდა მრავალსართულიანი საცხოვრებელი კორპუსი, გაჩნდა ხანძარი და დაშავდა სულ მცირე 12 ადამიანი.
დნეპროპეტროვსკის ოლქის სამხედრო ადმინისტრაციის ხელმძღვანელის, ალექსანდრ განჟას განცხადებით, დაშავებულთა შორის 13 წლის მოზარდიც არის. მძიმე მდგომარეობაში საავადმყოფოში რჩება 75 წლის ქალი, ხოლო დანარჩენმა დაზარალებულებმა პირველადი სამედიცინო დახმარება უკვე მიიღეს.
ადგილობრივები ყვებიან, რომ თავდასხმას ძლიერი აფეთქებები და დარტყმის ტალღა მოჰყვა, რომელმაც კორპუსებში ფანჯრები ჩაამსხვრია და ავტომობილები დააზიანა. ერთ-ერთი მცხოვრების თქმით, თავდასხმის დროს ორი კედლის უკან დამალვა მოასწრო, თუმცა აფეთქების ძალა იმდენად ძლიერი იყო, რომ საცხოვრებელი სახლი სერიოზულად დაზიანდა.
მეზობლების ინფორმაციით, აფეთქებებამდე „შაჰედის“ ტიპის დრონის ხმა ისმოდა. მათი თქმით, დრონი საცხოვრებელ კორპუსს მოხვდა, რასაც მალევე მეორე ძლიერი აფეთქებაც მოჰყვა. ადგილობრივები ამბობენ, რომ მიუხედავად დაზიანებებისა, მათი ოჯახის წევრები და შინაური ცხოველები უვნებლად გადარჩნენ.
