ქაოსი ესპანეთის საზღვარზე - სეუტაში არალეგალი მიგრანტების მასობრივი შეჭრის შემდეგ ვითარება უკიდურესად დაიძაბა. ჩრდილოეთ აფრიკაში მდებარე ესპანეთის ავტონომიურ ქალაქში ბოლო დღეებში ათასობით მიგრანტი ხმელეთითა და ზღვით შევიდა. მასობრივი შეჭრისას მომხდარ დაპირისპირებას მსხვერპლი მოჰყვა, ადგილობრივი ხელისუფლება კი მადრიდისგან საგანგებო ზომების მიღებასა და სამხედრო ძალების მობილიზებას ითხოვს.

ესპანეთის მთავრობამ რეგიონში დამატებითი სამხედროები და სამართალდამცველები გაგზავნა. პარალელურად, იტალიაში განიხილავენ ესპანეთთან შენგენის რეჟიმის დროებით შეჩერების შესაძლებლობას, რადგან შიშობენ, რომ მიგრაციული ნაკადი ევროკავშირის სხვა ქვეყნებზეც გავრცელდება.