პოლონეთი რუსეთის მხრიდან გახშირებული პროვოკაციებისა და უსაფრთხოების მზარდი საფრთხეების ფონზე ქვეყნის საჰაერო სივრცის დაცვას აძლიერებს. გადაწყვეტილება პოლონეთის თავდაცვის მინისტრმა და ვიცე-პრემიერმა ვლადისლავ კოსინიაკ-კამიშმა გამოაცხადა.

ახალი ზომების ფარგლებში გაიზრდება პოლონეთის სამხედრო ავიაციის აქტივობა. ქვეყნის ცის დასაცავად უფრო ინტენსიურად გამოიყენებენ F-16 ტიპის გამანადგურებლებსა და სამხედრო ვერტმფრენებს. ამასთან, მთელი ქვეყნის მასშტაბით ძლიერდება საფრთხეებზე სწრაფი რეაგირების სისტემები.

პოლონეთის თავდაცვის მინისტრის განცხადებით, ბოლო კვირებმა აჩვენა, რომ რუსეთის პროვოკაციები სხვადასხვა ფორმას იღებს და საფრთხე უკვე ისეთ ადგილებშიც ჩნდება, რომლებიც აქამდე უსაფრთხოდ მიიჩნეოდა. პოლონეთის შეიარაღებული ძალები განსაკუთრებული ყურადღებით აკვირდებიან ქვეყნის აღმოსავლეთ საზღვართან არსებულ ვითარებას.

გადაწყვეტილებას წინ უძღოდა კიდევ ერთი ინციდენტი ბალტიის ზღვის თავზე. პოლონურმა გამანადგურებლებმა რუსეთის სადაზვერვო Il-20 გადაიტაცეს, რომელიც დაახლოებით 40 კილომეტრში, უსტკის ჩრდილოეთით მიფრინავდა გამორთული საიდენტიფიკაციო მოწყობილობებით. პოლონეთის თავდაცვის უწყების ცნობით, რუსულ თვითმფრინავს ქვეყნის საჰაერო სივრცე არ დაურღვევია, თუმცა მისი ფრენა სამოქალაქო ავიაციისთვის საფრთხეს ქმნიდა. მსგავსი შემთხვევა რამდენიმე დღით ადრეც დაფიქსირდა.

ამავე ფონზე პოლონეთის საგარეო საქმეთა სამინისტროში რუსეთის ელჩი დაიბარეს და მოსკოვს რუსეთის პროვოკაციებისა და ჰიბრიდული ოპერაციების გამო ოფიციალური პროტესტი გადასცეს.