რუსეთიდან „ქართული ოცნების“ მისამართით მორიგი ქება ისმის. ამჯერად საქართველოს ხელისუფლების პოლიტიკას რუსეთის ხელმძღვანელობით მოქმედი კოლექტიური უსაფრთხოების ხელშეკრულების ორგანიზაციის, ОДКБ-ს ყოფილი გენერალური მდივანი ნიკოლაი ბორდიუჟა იწონებს.

ბორდიუჟა ამტკიცებს, რომ ევროკავშირს არც საქართველო სჭირდება და არც უკრაინა, დასავლეთი კი ორივე ქვეყანას მხოლოდ ფუჭ დაპირებებს აძლევს. მისი შეფასებით, უკრაინისგან განსხვავებით, საქართველოს ხელისუფლებამ „გონივრული გადაწყვეტილება“ მიიღო, როდესაც დასავლეთის მოწოდებებს არ გაჰყვა და რუსეთის წინააღმდეგ ე.წ. მეორე ფრონტის გახსნაზე უარი თქვა.

„ჩემი აზრით, ქართველები ძალიან ბრძენი ხალხია. მათ გაიგეს, საით მიჰყავდათ და როგორ იყენებდნენ. უკრაინამ ეს ვერ გაიგო, ქართველებმა კი გაიგეს. მათ მეორე ფრონტის გახსნა შესთავაზეს, როდესაც სპეციალური სამხედრო ოპერაცია დაიწყო, მაგრამ უარი თქვეს. მიხვდნენ, რომ მათი გამოყენებაც უბრალოდ საზარბაზნე ხორცად სურდათ და ამას ძალიან გონივრულად აარიდეს თავი.

ევროკავშირს საქართველოს საკუთარ შემადგენლობაში მიღება სურს? ძალიან მეეჭვება. ამ თემით თამაში შეიძლება, დაპირებების გაცემაც შეიძლება, რასაც აკეთებენ კიდეც. ევროპას საქართველო ევროკავშირში საერთოდ არ სჭირდება, უკრაინა კი - მით უმეტეს“, - განაცხადა ნიკოლაი ბორდიუჟამ.