ვულოცავთ ტრამპს პრეზიდენტის თანამდებობას, EU მოუთმენლად ელოდება მჭიდრო თანამშრომლობას - ლაიენი
ევროკომისიის პრეზიდენტი, ურსულა ფონ დერ ლაიენი დონალდ ტრამპს პრეზიდენრობას ულოცავს.
ევროკომისიის პრეზიდენტი სოციალურ ქსელში წერს, რომ EU გლობალური გამოწვევების გადასაჭრელად მოუთმენლად ელოდება ტრამპთან მჭიდრო თანამშრომლობას.
საუკეთესო სურვილებით ვულოცავთ პრეზიდენტ დონალდ ტრამპს აშშ-ის 47-ე პრეზიდენტის თანამდებობას. ევროკავშირი მოუთმენლად ელოდება თქვენთან მჭიდრო თანამშრომლობას გლობალური გამოწვევების გადასაჭრელად. ერთად ჩვენს საზოგადოებებს შეუძლიათ მიაღწიონ უფრო დიდ კეთილდღეობას და გააძლიერონ საერთო უსაფრთხოება. ეს არის ტრანსატლანტიკური პარტნიორობის უწყვეტი ძალა".- წერს ურსულა ფონ დერ ლაიენი
დონალდ ტრამპი ამერიკის შეერთებული შტატების 47-ე პრეზიდენტი ოფიციალურად გახდა - ტრამპმა უზენაესი სასამართლოს მთავარი მოსამართლის, ჯონ რობერტსის წინაშე, ბიბლიაზე ფიცი დადო.
დონალდ ტრამპის ინაუგურაციას ამერიკელი კანონმდებლები და სხვა ოფიციალური პირები ესწრებიან. ასევე დარბაზში ოთხი ყოფილი პრეზიდენტი: ბილ კლინტონი, ჯორჯ ბუში, ბარაკ ობამა და ჯო ბაიდენი იმყოფებიან.
ინაუგურაციის ცერემონიას ასევე ესწრება რამდენიმე უცხოელი ლიდერი, მათ შორის, საქართველოს მეხუთე პრეზიდენტი, სალომე ზურაბიშვილი.
ტრადიციულად, პრეზიდენტების ინაუგურაციის ცერემონიები კაპიტოლიუმის შენობის გარეთ იმართება, თუმცა, მოსალოდნელი ცივი ტემპერატურის გამო, იძულებული გახდნენ, ეს ტრადიცია დაერღვიათ და ფიცის დადების ცერემონია კაპიტოლიუმის შენობის როტონდაში დაეგეგმათ.
ცნობისთვის, ამერიკის ისტორიაში ტრამპი მეორე პრეზიდენტია, რომელმაც თეთრი სახლი ერთი ვადის გამოტოვებით დაიკავა და ყველაზე ასაკოვანი კანდიდატი, რომელმაც საპრეზიდენტო არჩევნები მოიგო.
