კითხვა მაქვს, წულუკიანი რატომ არ მოიყვანეთ სასამართლოში? - ამ სიტყვით მიმართა „ლელო ძლიერი საქართველოს“ ლიდერმა ლიდერმა მამუკა ხაზარაძემ მოსამართლე ზვიად შარაძეს.

• საქალაქო სასამართლოში მამუკა ხაზარაძის საქმის არსებით განხილვა მიმდინარეობს. კოალიცია "ძლიერი საქართვეელოს" ლიდერს  ტეა წულუკიანსი საგამოძიებო კომისიაზე არ მისვლის გამო ასამართლებენ. 

ხაზარაძემ დეტალურად ისაუბრა, თუ რატომ არ გამოცხადდა "ოცნების" საგამოძიებო კომისიის სხდომაზე, თქვა, რომ მისთვის პარლამენტი არალეგიტიმურია და იქ გამოცხადებას არ აპირებს.

"რაც გინდათ ის ქენით"- უთხრა ოპოზიციონერმა პოლიტიკოსმა მოსამართლეს 

მამუკა ხაზარაძემ ასევე ხაზგასმით აღნიშნა, რომ ამ საქმის ფარგლებში  უკანონოდ არიან დაკავებულები მისი თანაგუნდელები.

"ძლიერი საქართველოს" ლიდერმა ასევე განმარტა გირაოს გადახდის მიზეზი და თქვა: შემეძლო გირაო არ გადამეხადა, მაგრამ გადავიხადე, რომ ეს პროცესი გაიწელოს და ყველამ დაინახოს, რომ არც სასამართლო გვაქვს, არც სამართალი, არც კონსტიტუცია

„პოლიტიკაში მოვედი, რადგან ამ ქვეყანაში ძალიან ბევრი კანონია შესაცვლელი. ჩემი საქმიანი მოღვაწეობის პერიოდში, თითქმის არასდროს დამირღვევია კანონი, არასდროს მქონია საქმე სასამართლოში გარდა იმ პროცესისა, რომელიც მაშინ დაიწყო, როცა პოლიტიკაში მოსვლა გადავწყვიტე. პოლიტიკაში ვარ იმის გამო, რომ კანონები და ქვეკანონები, რომელიც ჩვენს ეროვნულ ინტერესებს უქმნის სერიოზულ საფრთხეს, შევცვალოთ. ე.წ. კომისია ე.წ. პარლამენტმა შექმნა, მისი ლეგიტიმაცია არ აღიარა დასავლეთმა. ჩვენ, მე და ჩვენმა გუნდმა უარი ვთქვით პარლამენტში შესვლაზე, დავტოვეთ მანდატები, ეს იყო ჩვენი პოლიტიკური გადაწყვეტილება. შემდეგ შექმნეს ე.წ. კომისია, კონსტიტუცია დაარღვიეს... ამდენ დროს იმიტომ ვხარჯავ, რომ კიდევ ერთხელ ნიღაბი ჩამოვხსნათ იმ დანაშაულს, რომელსაც ამ ხნის განმავლობაში ოპოზიციურ პოლიტიკოსებს თავს ახვევენ.

ჩემი კოლეგები დღეს ციხეში სწორედ ამის გამო სხედან, რადგან არაკონსტიტუციურმა კომისიამ დაიბარა, მათ უარი განაცხადეს მისვლაზე, ისევე როგორც მე და თანამებრძოლმა ბადრი ჯაფარიძემ უარი განვაცხადეთ. ამ კომისიაში არ ზის ოპოზიცია...

რეპრესია მიდის, ჩემი თანაგუნდელები დღეს ციხეში სხედან, ვეფხია კასრაძე, ვასილ კაძელაშვილი და კიდევ ზემოდან 50 ადამიანი, თურმე იმის გამო, რომ შეთქმულებას აწარმოებდნენ, არადა ხალხმა დარბაზში გაიცნო ერთმანეთი და 6 თვეა მიდის ადამიანების ვაჭრობა, დაშინება. ეს ცირკი, რომელიც სასამართლოში იმართება, ეს ლამაზად გამოწყობილი გოგოები - პროკურორები მოდიან და ბოროტებას ემსახურებიან. კითხვა მაქვს, წულუკიანი რატომ არ მოიყვანეთ სასამართლოში? ადამიანი, რომელიც არაკანონიერი კომისიის თავმჯდომარეა, ადამიანი, რომელმაც მისი თანაშემწის „სიგნალის“ „ჩათით“ დამიბარა, მოდიო - ჩემი დაქალია თუ ვინაა, ვერ გავიგე?!

წინა ხელისუფლების საქმიანობის გამოსაძიებელმა კომისიამ მე დამიბარა. რამე თანამდებობა მქონდა, არჩეული ვიყავი რამე თანამდებობაზე? წინა ხელისუფლება მდევნიდა? რატომ? იმიტომ რომ ეს არის პოლიტიკური დევნა. შემეძლო გირაო არ გადამეხადა, მაგრამ გადავიხადე, რომ ეს პროცესი გაიწელოს და ყველამ დაინახოს, რომ არც სასამართლო გვაქვს, არც სამართალი, არც კონსტიტუცია“, - განაცხადა ხაზარაძემ.

სასამართლო პროცესზე რამდენიმე წუთის წინ დასრულდა პარლამენტის თანამშრომლის, თეა წულუკიანის სამდივნოს წევრის გამოკითხვა, ადამიანის, რომელმაც მოკლე ტექსტური შეტყობინება გაუგზავნა მამუკა ხაზარაძეს "სიგნალის" მეშვეობით. 

• დღეს არის დაგეგმილი "ძლიერი საქართველოს" ლიდერის, ბადრი ჯაფარიძის პროცესიც იგივე საქმეზე.

მამუკა ხაზარაძეს და ბადრი ჯაფარიძეს ბრალდება სისხლის სამართლის კოდექსის 349-ე მუხლით წარედგინა, რაც "საქართველოს პარლამენტის დროებითი საგამოძიებო კომისიის მოთხოვნის შეუსრულებლობას" გულისხმობს. აღნიშნული ქმედება ისჯება ჯარიმით, ან თავისუფლების აღკვეთით ვადით ერთ წლამდე, თანამდებობის დაკავების, ან საქმიანობის უფლების ჩამორთმევით ვადით სამ წლამდე

„ლელო - ძლიერი საქართველოს“ ლიდერებს აღნიშნულ საქმეზე აღკვეთის ღონისძიების სახით 50 000-50 000 ლარიანი გირაო შეეფარდათ.