"ნაციონალური მოძრაობის" გენერალური მდივანი, პეტრე ცისკარიშვილი დიდი ბრიტანეთის გაფრთხილებას ეხმიანება და აცხადებს, რომ როგორც ჩანს, ბრიტანეთს აქვს კონკრეტული ინფორმაცია, თუ როგორ ცდილობენ და ახერხებენ კიდეც "ქართველი ე.წ. ბიზნესმენები რუსეთში სხვადასხვა საქონლის მიწოდებას და დახმარებას, რომ რუსეთმა გვერდი აუაროს სანქციებს". 

მისი თქმით, აღნიშნულს აუცილებლად მოჰყვება ინდივიდუალური სანქციები, თუმცა ამით ქვეყნის რეპუტაცია დაზიანდება. 

ჩვენ მთელი ამ ბოლო პერიოდის განმავლობაში, მას შემდეგ, რაც რუსეთის აგრესია დაიწყო უკრაინაში, “ნაციონალური მოძრაობა” ვამბობდით, რომ ივანიშვილმა და მის გარშემო არსებულმა ბიზნესებმა თუ ოჯახებმა დაალაგა სქემები რუსეთთან, რომ რუსეთმა სანქციებს გვერდი აუაროს, ამაზე ბენეფიტი სამხედრო თვალსაზრისით მიიღო რუსეთმა, ხოლო ფინანსური ბენეფიტი მიიღო ივანიშვილის კლანმა. ეს რომ შეუმჩნეველი არ დარჩებოდა ყველას ძალიან კარგად გვესმის და მათ შორის არც დიდი ბრიტანეთის მხრიდან, რადგან როგორც ჩანს მათ აქვთ კონკრეტული ინფორმაციები თუ როგორი თაღლითური სქემებით ცდილობენ და ხშირ შემთხვევაში ახერხებენ კიდეც ქართველი ე.წ. ბიზნესმენები რუსეთში სხვადასხვა საქონლის მიწოდებას და რა თქმა უნდა, ამას ექნება თავისი შედეგები, ამას მოჰყვება სანქციები, ეს იქნება ინდივიდუალური სანქციები, ვინც ჩართულია საქმეში, მაგრამ ამით დაზიანდება ჩვენი ქვეყნის რეპუტაცია, ჩვენი ეკონომიკა, აღარ შემოვა ინვესტიციები, რადგან დასავლეთის მხრიდან კიდევ უფრო გაღრმავდება საქართველოს მიმართ სანქციები," - განაცხადა პეტრე ცისკარიშვილმა. 

დიდი ბრიტანეთის მთავრობა ქართულ ბიზნესს აფრთხილებს-“ვინც რუსეთს სანქციებისაგან გვერდის ავლაში ეხმარება, თავად აღმოჩნდება სანქციების  ქვეშ.“

განცხადებაში, რომელიც ბრიტანეთის სამთავრობო პორტლაზე აიტვირთა, კონკრეტული მაგალითებით არის ახსნილი - რა ითვლება სანქციებისგან თავის არიდებაში დახმარებად.

დოკუმენტის თანახმად, სანქციები არ ვრცელდება მხოლოდ ბრიტანეთის მოქალაქეებზე, ის ვრცელდება ყველა ბიზნესზე, რომელიც ბრიტანეთშია რეგისტრირებული.