ომბუდსმენი აბრამოვის მიმართ გამოტანილ გამამართლებელ განაჩენს ეხმაურება
ქართველოს სახალხო დამცველი თედო აბრამოვის მიმართ თბილისის საქალაქო სასამართლოს მიერ გამოტანილ გამამართლებელ განაჩენს ეხმაურება.
ომბუდსმენის აპარატი წერს, რომ 14 აპრილს აბრამოვის ბრალდების საქმეზე სახალხო დამცველმა სასამართლოს მეგობრის მოსაზრებით (Amicus Curiae) თბილისის საქალაქო სასამართლოს მიმართა, სადაც პირადი ჩხრეკის ჩატარებისას ნეიტრალური მტკიცებულებების უზრუნველსაყოფად საკონსტიტუციო სასამართლოსა და ადამიანის უფლებათა ევროპული სასამართლოს სტანდარტის დაცვის აუცილებლობაზე მიუთითებდა.
სახალხო დამცველი იმეორებს, რომ ისეთ შემთხვევებში, როდესაც ჩხრეკისას სამართალდამცავებს აქვთ ნეიტრალური მტკიცებულებების, მათ შორის, ვიდეოჩანაწერების მოპოვების ობიექტური შესაძლებლობა და აღნიშნულს არ ახორციელებენ, ხოლო ბრალდება არსებითად მხოლოდ პოლიციელების ჩვენებებს ეყრდნობა, ვერ ჩაითვლება ადამიანის უფლებებთან შესაბამის პრაქტიკად, მით უმეტეს, პირის პასუხისგებაში მიცემის მიმართულებით.
სახალხო დამცველი იმედს იტოვებს, რომ თევდორე აბრამოვის მიმართ გამამართლებელი განაჩენის გამოტანას დადებითი გავლენა ექნება პოლიციის მხრიდან ნეიტრალური მტკიცებულებების მოპოვების ვალდებულების დამკვიდრებასა და სწორი სასამართლო პრაქტიკის განვითარებაზე.
