დააკვირდება თუ არა საერთაშორისო სადამკვირვებლო ორგანიზაცია არჩევნებს "ქართულ ოცნებას" გადაწყვეტილი ჯერ ისევ არ აქვს - არ იციან, მოიწვევენ თუ არა არჩევნებზე დასაკვირვებლად ეუთო/ოდირის მისიას. მამუკა მდინარაძემ არც ის დამალა, რომ ეუთოს დასკვნას მისი პარტიისთვის გადამწყვეტი მნიშვნელობა არ აქვს.

დარჩება თუ არა არჩევნები გავლენიანი სადამკვირვებლო მისიების მიღმა? - მდინარაძეს არ დაუმალავს, რომ თუ არჩევნების დაკვირვებაში წლების სტაჟის მქონე არასამთავრობო ორგანიზაციები, "ქართული ოცნების" მიღებულ კანონებს არ დაემორჩილებიან, ისინი საარჩევნო უბნებს მიღმა დარჩებიან.

"ქართული ოცნების" დამოკიდებულება ეუთო/ოდირის მიმართ არასამთავრობო ორგანიზაციებისთვის სიგნალია, თუ რა მიზანი ამოძრავებს ივანიშვილის გუნდს - თვლიან, რომ "ოცნება" საარჩევნო დარღვევების სააშკარაოზე გამოტანას ერიდება.

ვინ დააკვირდება არჩევნებს? - ეუთო/ოდირის ბედი ჯერ გაურკვეველია, თუმცა ცესკო-ს საიტზე არც ქართული სადამკვირვებლო მისიები არიან დარეგისტრირებულები - ის ორგანიზაციები, ვისაც ცესკო არეგისტრირებს ფასდებიან გონგოებად, ანუ "ქართულ ოცნებასთან" დაახლოებულ ორგანიზაციებად, ვინც მითითებებს სწორედ პარტიიდან იღებენ და არჩევნების დაკვირვების ნაცვლად, საარჩევნო უბნებზე სულ სხვა საქმით არიან დაკავებულები.

დეტალები ნახეთ ნინო ღვედაშვილის რეპორტაჟში