“პროკურატურის ნაბიჯი ნათლად ადასტურებს, რომ ივანიშვილის ხელისუფლება რუსეთის ინტერესებს ატარებს, - ასე აფასებს “ნაციონალური მოძრაობის” ლიდერი, ლევან სანიკიძე არასამთავრობოების დაყადაღების ფაქტს. 

მისი თქმით, ევროპელი პარტნიორების გაფრთხილების მიუხედავად, "ოცნებამ" რუსული კანონის საფუძველზე დაიწყო რეპრესიები, რაც ქვეყნისთვის ვიზალიბერალიზაციის შეჩერების საფრთხეს ქმნის და საქართველოს ევროპული ინტეგრაციის დასრულებას ისახავს მიზნად.

ჩვენ ვნახეთ ევროპელი პარტნიორების უმნიშვნელოვანესი გზავნილი, რომლის მიხედვითაც ვიზალიბერალიზაციის შეჩერების საკითხთან დაკავშირებით აუცილებელია “ქართული ოცნების” მხრიდან, ეს რაღაც მგლის თავზე სახარების კითხვასავით არის, მაგრამ აუცილებელია რუსული კანონის გაუქმება, მისი აღსრულებაში არმოყვანა და ამის საპასუხოდ დღეს საქართველოს პროკურატურამ არასამთავრობო ორგანიზაციების მიმართ დაიწყო იმ რეპრესიების გატარება, რასთან დაკავშირებითაც გუშინ გააფრთხილეს, რომ არ მომხდარიყო მსგავსი ნაბიჯების გადადგმა.

ეს არის იმის ნათელი დასტური, რომ სწორედ ივანიშვილი ასანქცირებს 4 მილიონ ქართველს, გვართმევს უვიზო მიმოსვლის შესაძლებლობას და ეს სცდება მხოლოდ ამ საკითხს. ეს არის ცივილიზაციური დაპირისპირება, სადაც საქართველოს ევროპული ნაწილი ებრძვის მოღალატეთა რაზმს, რომლის მთავარი დანიშნულება რუსეთის ფედერაციის ინტერესების გატარებაა, რაც თავისთავად გულისხმობს საქართველოს ევროპული ინტეგრაციის ერთხელ და სამუდამოდ დასრულებას, რაც არავითარ შემთხვევაში არ უნდა დავუშვათ, - განაცხადა ლევან სანიკიძემ.