"ევრობარომეტრის" კვლევის მიხედვით, ყველა აუცილებელი კრიტერიუმის დაკმაყოფილების შემთხვევაში, საქართველოს ევროკავშირში გაწევრიანების მომხრე ევროკავშირის 27 წევრი ქვეყნის მოსახლეობის 46%-ია, წინააღმდეგი კი 43%. ინფორმაცია ევროკავშირის გაფართოების შესახებ ევროკომისიის მიერ გამოქვეყნებულ "ევრობარომეტრის" კვლევის ანგარიშშია მოცემული. 

კვლევაში მოცემულია თითოეულ ქვეყანაში ჩატარებული გამოკითხვის შედეგები. კრიტერიუმის დაკმაყოფილების შემთხვევაში, საქართველოს ევროკავშირში გაწევრიანების მომხრეთა ყველაზე მაღალი მაჩვენებელი შვედეთში დაფიქსირდა:

• შვედეთი - 71%, 
• ლიტვაში – 62%, 
• ლატვიაში – 62%, 
• დანიაში – 61%, 
• კვიპროსში – 58%, 
• ხორვატიაში – 57%, 
• სლოვაკეთში – 57%, 
• უნგრეთში – 57%, 
• ესპანეთში – 56%, 
• საბერძნეთში – 54%, 
• ნიდერლანდებში 52%, 
• პორტუგალიაში – 51%.

ანგარიშის მიხედვით, საქართველოს ევროკავშირში გაწევრიანებას ყველაზე მეტი მოწინააღმდეგე ავსტრიაში, ჩეხეთში, გერმანიაში, იტალიასა და საფრანგეთში ჰყავს.

კერძდ:

• ავსტრიაში გამოკითხულთა 64%-ია წინააღმდეგი, ხოლო 29% მომხრე. 
• ჩეხეთში წინააღმდეგია 61%, მომხრე 29%;
• გერმანიაში წინააღმდეგია 53%, მომხრე 37%;
• იტალიაში წინააღმდეგია 49%, მომხრე 45%;
• საფრანგეთში კი წინააღმდეგია 48%, მომხრე 36%.

ამასთან, კვლევის მიხედვით, ზოგადად ევროკავშირის გაფართოებას, წევრი ქვეყნების მოქალაქეთა 56% უჭერს მხარს.

კვლევა, დღეს, კოპენჰაგენში ევროკავშირის წევრი ქვეყნების ევროპის საქმეთა მინისტრების არაფორმალური შეხვედრის ფარგლებში გამოქვეყნდა, სადაც ევროკავშირის გაფართოების საკითხი განიხილებოდა.