ევროპარლამენტარების ვიზიტი ემსახურება მხარდაჭერის გამოხატვას ქართველი ხალხის მიმართ - რა თქმა უნდა, განვიხილეთ ივანიშვილსა და მის გარემოცვაზე სანქციების ამოქმედების აუცილებლობა, - ამის შესახებ „ერთიანი ნაციონალური მოძრაობის“ თავმჯდომარემ, თინა ბოკუჩავამ ევროპარლამენტის სოციალ-დემოკრატიული პარტიის დელეგაციის წევრებთან გამართული შეხვედრის შემდეგ განაცხადა.

მისი თქმით, აქტიურად მუშაობენ, რომ უვიზო მიმოსვლა არ შეჩერდეს მოქალაქეებისთვის და „შეეხოს მხოლოდ ივანიშვილს, მის გარემოცვას და პროპაგანდისტებს“.

ევროპარლამენტარების ვიზიტი ემსახურება მხარდაჭერის გამოხატვას ქართველი ხალხის მიმართ, რომლებიც იბრძვის ევროპული დროშისთვის და ღირებულებებისთვის. რა თქმა უნდა, ასევე განვიხილეთ ივანიშვილსა და მის გარემოცვაზე სანქციების ამოქმედების აუცილებლობა.

იცით, მე პირადად აქტიურად ვიყავი ჩართული იმ ძალისხმევაში, რომ საქართველოს მოქალაქეები არ დაისაჯონ ივანიშვილის ავტოკრატიული ნაბიჯების გამო, უვიზო მიმოსვლის გაუქმება არ მოხდეს ე.წ. ბლანკეტური წესით, ანუ არ შეეხოს ყველა მოქალაქეს, მხოლოდ ივანიშვილს შეეხოს, მის გარემოცვას, პროპაგანდისტებს, ფინანსურ ელიტას, მოძალადეებს, ცრუ მოწმეებს, ე.წ. მოსამართლეებს. ვფიქრობ, ამ მიმართულებით ჩვენი მუშაობა ძალიან ნაყოფიერია და იმედი მაქვს, მალე მოხდება ამ მექანიზმის ამოქმედება“, - აღნიშნა ბოკუჩავამ.

გარდა ამისა, მისივე თქმით, დიდ ბრიტანეთში ძალიან ინტენსიურად მიმდინარეობს მუშაობა „ქართული ოცნების“ წარმომადგენლებისთვის სანქციების დაწესებაზე.

„არის დიდი ბრიტანეთი, რომელიც ვიცით, რომ აღარ არის ევროკავშირის წევრი. ეროვნულ დონეზე, ეროვნული პრეროგატივა გააჩნიათ ინდივიდუალური სანქციების დაწესების. გვინდა ვიხილოთ მეტი სანქცია, უფრო სწრაფად და უფრო მაღალ ეშელონებში. ამას დრო სჭირდება. გარწმუნებთ, ძალიან ინტენსიურად მიმდინარეობს ამ საკითხზე მუშაობა დიდ ბრიტანეთში“, - აღნიშნა ბოკუჩავამ.