ლუქსემბურგში დღეს გაიმართება ევროკავშირის საგარეო საქმეთა საბჭოს შეხვედრა, სადაც ერთ-ერთი განსახილველი თემა საქართველოში მიმდინარე პოლიტიკური ვითარება იქნება.

ევროკავშირის ოფიციალური ვებგვერდის ცნობით, საგარეო და უსაფრთხოების პოლიტიკის უმაღლესი წარმომადგენელი კაია კალასი მინისტრებს მიაწვდის ინფორმაციას საქართველოში ბოლო მოვლენებზე, მათ შორის 2025 წლის 4 ოქტომბერს ჩატარებული მუნიციპალური არჩევნებისა და დემოკრატიული უკუსვლის შესახებ.

შეხვედრაზე განიხილავენ აგრეთვე უკრაინის წინააღმდეგ რუსეთის აგრესიასთან დაკავშირებულ ბოლო მოვლენებს, ევროკავშირის ურთიერთობებს ინდო-წყნარი ოკეანის რეგიონთან, და ისაუბრებენ ახლო აღმოსავლეთში არსებულ ვითარებაზეც.

გარდა ამისა, მინისტრებს მიეწოდებათ განახლებული ინფორმაცია საქართველოს, მოლდოვასა და სუდანის საკითხებზე.

საგარეო საქმეთა საბჭოს სხდომა საქართველოს დროით 11:15 საათზე დაიწყება და მას კაია კალასი უხელმძღვანელებს.