კახა კალაძე ეუთოს ანგარიშს "სრულ ბოდვას" უწოდებს და აცხადებს, რომ "ოცნება" არ გეგმავს იმ კანონები გაუქმებას, რომელიც ბოლო დროს მიიღო. 

მისი მტკიცებით, ხელისუფლება გადაწყვეტილებებს მხოლოდ ქვეყნის ინტერესებიდან გამომდინარე მიიღებს და არ დაუშვებს, რომ საქართველო „გარე აქტორების სურვილების შესაბამისად“ იმოქმედოს.

„ეს არის სრული ბოდვა. ყველა კარგად ვხვდებით თუ რატომ დაიწყო ეს ყველაფერი, რა დგას ამ ყველაფრის უკან. ჩვენ გვთხოვენ გავაუქმოთ „ოჯახური ღირებულებებისა და არასრულწლოვანის დაცვის შესახებ“ კანონი, გვთხოვენ გავაუქმოთ „უცხოური გავლენის გამჭვირვალობაზე კანონი“ (TFI), „უცხოური აგენტების რეგისტრაციის აქტი“ (FARA) და ვიმოქმედოთ არა ქვეყნის ინტერესებიდან გამომდინარე, არამედ მათი სურვილების შესაბამისად. წარმოუდგენელია, ბევრჯერ გაგვიკეთებია განცხადება და გავიმეორებ: საქართველოს ხელისუფლება იმოქმედებს ისე და ყველაფერს ისე გააკეთებს, რაც სჭირდება პირველ რიგში ქვეყანას.

დასრულდა ის დრო, როდესაც გარედან მოდიოდა მითითებები, დავალებები და თავჩაღუნულები იღებდნენ გადაწყვეტილებას. ჩვენ ვიმოქმედებთ ქვეყნის ინტერესებიდან გამომდინარე. ქვეყნის შიგნით რა კანონებია საჭირო, ამას საქართველოს ხელისუფლება გადაწყვეტს, რომელიც მოსახლეობის უმრავლესობამ აირჩია და არა გარედან ვიღაცების დავალებით და ხელის ქნევით მიღებული გადაწყვეტილებები.

ინტერესებს რაც შეეხება, ვხედავთ, რა პროცესები მიდის. უკრაინაში ერთსქესიანთა ქორწინება სასამართლომ დაუშვა და ვიცით, საით მიდის ყველაფერი. გარე აქტორების სურვილია, ისეთი ქვეყნები, როგორიც საქართველოა, უკრაინა, საკუთარი ინტერესების გასატარებლად იყოს გამოყენებული. არ დავუშვებთ ისეთი გადაწყვეტილების მიღებას, რომ დავაზიანოთ ქვეყნის ინტერესი, ეკონომიკა, ქართველი ხალხი. ამას არ გააკეთებს საქართველოს ხელისუფლება.

მთელმა რიგმა ქვეყნებმა: სომხეთი, აზერბაიჯანი, თურქეთი, ესპანეთი, აშშ, საფრანგეთი - მხარი არ დაუჭირეს ამ გადაწყვეტილებას, რაც მისასალმებელია. ეს არის სრული ბოდვა, რაც არის ამ დოკუმენტში“,- აღნიშნა კალაძემ.

ხედავთ, რა პროცესები მიმდინარეობს მსოფლიოში, როგორი საფრთხის წინაშე დგას. ყველა ქვეყანა საკუთარი ინტერესებით მოქმედებს. ჩვენ არ დავუშვებთ, ვიღაცას დიდ ქვეყნებს, პოლიტიკურ მოთამაშეებს შესაძლებლობა მივცეთ, პატარა მაგრამ უდიდესი კულტურის და ტრადიციების მქონე ქვეყანა თავისი ინტერესებით გამოიყენოს. საკუთარ თავზე გვაქვს გამოცდილი რამხელა უბედურება შეიძლება მოიტანოს ომმა. 2008 წლის ტკივილი და ჭრილობა არ მოგვიშუშებია, მხოლოდ ქვეყნის ინტერესებიდან გამომდინარე ვმოქმედებთ“,- აღნიშნა კალაძემ.

ასევე ნახეთ:

• “მოსკოვის მექანიზმის“ ანგარიში ცნობილია - რა წერია დოკუმენტში

რა წერია „მოსკოვის მექანიზმის“ ანგარიშში ჰააგასთან დაკავშირებით: 

• ეუთოს მოსკოვის მექანიზმის ფარგლებში მომზადებული ანგარიში, რომელიც რომის სტატუტის წევრ ქვეყნებს აძლევს რეკომენდაციას, რომ მათ შეიძლება განიხილონ საქართველოში არსებული ვითარების გადაცემა სისხლის სამართლის საერთაშორისო სასამართლოსთვის (ICC), "პოლიტიკური დევნის, წამებისა და სხვა არაადამიანური ქმედებების მზარდი შემთხვევების გათვალისწინებით".

რა არის რომის სტატუტი:

დოკუმენტი, რომლითაც შეიქმნა ჰააგის სისხლის სამართლის საერთაშორისო სასამართლო (ICC). საქართველო ამ სტატუტის წევრია, ნებისმიერ სხვა წევრ სახელმწიფოს აქვს უფლება, მიმართოს პროკურორს და მოითხოვოს საქართველოში სავარაუდოდ ჩადენილი დანაშაულის გამოძიება.