"ქართული ოცნების" დეპუტატი, ეკა ჭიჭინაძე "პირველებთან" მოსალოდნელ სამთავრობო ცვლილებებს არ უარყოფს. 

ბიძინა ივანიშვილთან და მის ოჯახთან დაახლოებული, ეკა ჭიჭინაძე "TV პირველთან" ამბობს, რომ "რაღაც იქნება", მაგრამ კონკრეტულად რა - მან "არ იცის". 

ეს ჩემი უფლებამოსილება არ არის... მე არ უნდა ვიცოდე. იქნება ალბათ რაღაც, მაგრამ რა არ ვიცი," - თქვა ეკა ჭიჭინაძემ. 

"ოცნების" კიდევ ერთი წევრი, ლევან მახაშვილი კი ამტკიცებს, რომ საკადრო ცვლილებების გადაწყვეტილებას პრემიერ-მინისტრი იღებს და ირაკლი კობახიძის გადასაწყვეტია "კონკრეტულ შემთხვევაში სად, როგორ, რანაირად შეიძლება იყოს მთავრობა ჩამოყალიბებული". 

საკადრო გადაწყვეტილებები, ეს არის პრემიერ-მინისტრის პრეროგატივა მთავრობაში და არის სრულად მისი გადასაწყვეტი იმ მიზნებიდან და ამოცანებიდან გამომდინარე, რომელიც კონკრეტულ შემთხვევაში, კონკრეტულ პერიოდში შეიძლება არსებობდეს სახელმწიფოს წინაშე.  

ვერ გეტყვით [რამდენად მოსალოდნელია], მაგიტომ ვამბობ, ეს არის სრულად პრემიერ-მინისტრის გადასაწყვეტი, ეს მისი კომპეტენციაა და კონკრეტული ამოცანებიდან გამომდინარე მას შეუძლია გადაწყვიტოს, კონკრეტულ შემთხვევაში სად, როგორ, რანაირად შეიძლება იყოს მთავრობა ჩამოყალიბებული," - ამბობს ლევან მახაშვილი. 

ცნობისთვის, "პირველების" ინფორმაციით, ძალოვანი მინისტრები იცვლებიან - საუბარია შინაგან საქმეთა მინისტრ გელა გელაძეზე. როგორც წყარო "ტვ პირველს" ეუბნება, ერთ-ერთი ვერსიით, "ქართული ოცნება" განიხილავს გელაძის თავდაცვის სამინისტროში გადაყვანას - თავდაცვის მოქმედ მინისტრს, ირაკლი ჩიქოვანს კი დიპლომატიურ მისიაში უშვებენ. 

ვინ ჩაიბარებს შს სამინისტროს, ეს ჯერ-ჯერობით გადაწყვეტილი არ არის, თუმცა როგორც წყარო გვეუბნება, შესაძლოა მინისტრად გეკა გელაძის მოადგილე, რონი მესხი ვიხილოთ.