სომხეთში ვადამდელ საპარლამენტო არჩევნებზე ამომრჩეველთა აქტივობა მაღალი რჩება. ქვეყნის ცენტრალური საარჩევნო კომისიის მონაცემებით, ერევნის დროით 17:00 საათისთვის, კენჭისყრის დასრულებამდე სამი საათით ადრე, არჩევნებში მონაწილეობა ამომრჩეველთა 48.92%-მა მიიღო.

ოფიციალური ინფორმაციით, აღნიშნული დროისთვის ხმის მიცემა 2 503 976 ამომრჩევლიდან 1 224 957-მა მოქალაქემ მოახერხა.

სომხური მედიის შეფასებით, ეს მაჩვენებელი წინა საპარლამენტო არჩევნებთან შედარებით დაახლოებით 11%-ით მეტია, რაც ამომრჩეველთა გაზრდილ ინტერესსა და მაღალ ჩართულობაზე მიუთითებს.

ყველაზე მაღალი აქტივობა ქვეყნის დედაქალაქში ფიქსირდება. ერევანში, სადაც სომხეთის ამომრჩეველთა მესამედზე მეტი ცხოვრობს, 17:00 საათისთვის საკუთარი არჩევანი 412 168-მა მოქალაქემ დააფიქსირა, რაც რეგისტრირებული ამომრჩევლების 48.52%-ს შეადგენს.