დაეწრება თუ არა “ნაციონალური მოძრაობის“ ყრილობას უკვე ყოფილი თავმჯდომარე, თინა ბოკუჩავა - პარტიაში ამბობენ, რომ არ არსებობს არგუმენტის, რომლის საფუძველზეც ბოკუჩავა 5 აგვისტოს ყრილობაზე არ იქნება.

გიორგი ბარამიძის თქმით, თარიღი სწორედ იმის გამო შეირჩა, რომ ბოკუჩავა ნამდვილად თბილისში ყოფილიყო და გასაკვირი იქნება, თუ ის ვერ მოახერხებს, ან არ ისურვებს ყრილობაზე დასწრებას. 

ძალიან უცნაური იქნება, თუ არ დაესწრება, მე მოლოდინი მაქვს, რომ დაესწრება, მითუმეტეს, გენერალურმა მდივანმაც ილაპარაკა და თინასაც არ უარყვია, რომ სწორედ იმის მიხედვით შეირჩა საბოლოოდ ყრილობის თარიღი, რომ ის ნამდვილად თბილისში ყოფილიყო. თუმცა, ეს ნამდვილად არ ნიშნავს, რომ ქობულეთიდან თბილისში ჩამოსვლა პოლიტიკური საბჭოს სხდომაზე დასასწრებად არ იყო შესაძლებელი. 5 -ში, როგორც ვიცი, თინა ფიზიკურად თბილისშია და ძალიან გამიკვირდება, კიდევ უფრო გამიკვირდება, მან რომ ვერ მოახერხოს, ან არ ისურვოს, მისი პარტიის ყრილობაზე მოსვლა, - ამბობს ბარამიძე. 

“ნაციონალური მოძრაობის“ რიგით მე-13 ყრილობა 5 აგვისტოს, 13:00 საათზე  გაიმართება.

რაც შეეხება თავად ბოკუჩავას პოზიციას - პოლიტიკოსი 2 დღის წინ ამბობდა, რომ გადაწყვეტილი არ აქვს, დაესწრება თუ არა 5 აგვისტოს ჩანიშნულ ყრილობას. ბოკუჩავამ აღნიშნა, რომ ეს დამოკიდებული იქნება იმ პასუხებზე, რასაც ის პარტიის გენერალური მდივნისგან, პეტრე ცისკარიშვილისგან მიიღებს.