საქართველოს ხელისუფლებამ უნდა უზრუნველყოს, რომ არ მოხდეს დენის კულანინის რუსეთში დეპორტირება - ამის შესახებ განცხადებას ორგანიზაცია Amnesty International-ის აღმოსავლეთ ევროპისა და ცენტრალური აზიის მიმართულების დირექტორის მოადგილე, დენის კრივოშეევი ავრცელებს.

მისი თქმით, რუსეთში ომის საწინააღმდეგო დისიდენტობის მკაცრი რეპრესიების პირობებშია, შესაბამისად დენის კულანინი შეიძლება თვითნებური დევნისა და პატიმრობის, წამების ან სხვა არასათანადო მოპყრობის რეალური რისკის წინაშე აღმოჩნდეს. 

„დენის კულანინი საჯაროდ დაუპირისპირდა უკრაინის წინააღმდეგ რუსეთის ომს და მხარდაჭერა გამოუცხადა ალექსეი ნავალნის - ორივე ქმედება რუსეთში დანაშაულად ითვლება და პატიმრობით ისჯება. საქართველოს ხელისუფლებამ უნდა უზრუნველყოს, რომ არ მოხდეს მისი დეპორტირება რუსეთში, სადაც ომის საწინააღმდეგო დისიდენტობის მკაცრი რეპრესიების ამჟამინდელ პირობებში, ის შეიძლება თვითნებური დევნისა და პატიმრობის, წამების ან სხვა არასათანადო მოპყრობის რეალური რისკის წინაშე აღმოჩნდეს.

საქართველო ვალდებულია დაიცვას არგაძევების პრინციპი, რომელიც კრძალავს ნებისმიერი პირის ისეთ ქვეყანაში გადაყვანას, სადაც მას ადამიანის უფლებების სერიოზული დარღვევის რეალური საფრთხე ემუქრება. საქართველოს ხელისუფლებამ ასევე უნდა უზრუნველყოს, რომ დენის კულანინს შეეძლოს ეფექტურად მოითხოვოს საერთაშორისო დაცვა, მათ შორის ნებაყოფლობით გაემგზავროს უსაფრთხო მესამე ქვეყანაში“, - აღნიშნულია განცხადებაში.

დენის კულანინი სასამართლო პროცესის მოლოდინშია. რამდენიმე დღეში გაირკვევა დაადეპორტებენ თუ არა რუს აქტივისტს სამშობლოში, სადაც მის სიცოცხლეს საფრთხე ემუქრება.

მიგრაციის დეპარტამენტმა სასამართლოს გაძევების მოთხოვნით უკვე მიმართა. დაპატიმრებულ აქტივისტს საკუთარი პოზიციის წარსადგენად 72 საათი აქვს. ახლა მთავარი კითხვაა რა გადაწყვეტილებას მიიღებს ქართული სასამართლო და მისცემენ თუ არა ყაველაშვილის მიერ შეწყალებულ აქტივისტს მესამე ქვეყანაში წასვლის უფლებას.