ირაკლი კობახიძე ბრიუსელში, „ევრონიუსის“ (Euronews) მიერ ორგანიზებულ ევროკავშირის გაფართოების სამიტზე მედიის მიწვევით მიემგზავრება.

ინფორმაცია “პირველებს“ მთავრობის ადმინისტრაციაში დაუდასტურეს.

მანამდე “ევროსკოპმა“ გაავრცელა ინფორმაცია, რომ კობახიძე Euronews-ის მიერ ორგანიზებული „ევროკავშირის გაფართოების სამიტის“ (EU Enlargement Summit) სპიკერების სიაშია.

სამიტის ოფიციალურ ვებგვერდზე გამოქვეყნებული ინფორმაციის თანახმად, ღონისძიება 3 ნოემბერს ბრიუსელში გაიმართება და მასში მონაწილეობას პოლიტიკოსები, ექსპერტები და ბიზნესის წარმომადგენლები მიიღებენ. დისკუსია Euronews-ის აუდიტორიისთვის პირდაპირ ეთერში გადაიცემა.

აღსანიშნავია, რომ Euronews-ის სამიტი ევროკომისიის მიერ ორგანიზებული გაფართოების ფორუმისგან განსხვავებული ღონისძიებაა. ევროკომისიის ფორუმი, სახელწოდებით „უფრო ფართო ევროპა - უფრო ძლიერი ევროპა“, ბრიუსელში 15-16 ნოემბერს გაიმართება.

ასევე ცნობილია, რომ „ქართული ოცნების“ წარმომადგენლები ევროკავშირის გაფართოების ფორუმზე არ მიუწვევიათ.