"ქართული ოცნების" თავმჯდომარე ევროპარლამენტის მოთხოვნას, დასანქცირდეს ბიძინა ივანიშვილი, "პარადოქსს" უწოდებს. 

პარადოქსია, მაგრამ ფაქტია, რომ სააკაშვილისა და გვარამიას გათავისუფლებისკენ მოწოდების ფონზე, ევროპარლამენტის რეზოლუცია პოლიტიკიდან გასულ ბიძინა ივანიშვილს ლამის ქართული დემოკრატიის მტრად აცხადებს და მის წინააღმდეგ სანქციების დაწესებას მოითხოვს"-  განაცხადა ირაკლი კობახიძემ. 

მისი თქმით, "როდესაც პოლიტიკიდან გასულ ადამიანს ევროპარლამენტის რეზოლუცია პოლიტიკაში ჩართულობას ყოველგვარი არგუმენტისა და მტკიცებულების გარეშე ედავება, ეს ცალკე პრობლემაა".

თეორიულად რომც დავუშვათ, რომ ბიძინა ივანიშვილი ჩართულია პოლიტიკაში, გაუგებარია, რას ედავებიან მას ადამიანები, რომლებიც საკუთარ თავს საქართველოს კეთილმოსურნეებს უწოდებენ. ფაქტია და სინამდვილეში მათაც ძალიან კარგად იციან, რომ ბიძინა ივანიშვილის დამსახურებით საქართველომ 2012 წლის შემდეგ დემოკრატიის, ადამიანის უფლებებისა და მედიის თავისუფლების მიმართულებით მხოლოდ პროგრესი, თანაც ფუნდამენტური პროგრესი განიცადა"- აღნიშნა მმართველი პარტიის თავმჯდომარემ. 

მისივე მტკიცებით, "ერთადერთი, რასაც ივანიშვილს საქართველოს "კეთილმოსურნე" შეიძლება ედავებოდეს, ის შეიძლება იყოს, რომ საქართველოს ხელისუფლებამ რუსეთს სანქციები არ დაუწესა და ამით საკუთარი ქვეყანა და ხალხი არ დასაჯა". 

საქართველოს "კეთილმოსურნეებს" ალბათ, აღიზიანებთ ის ფაქტი, რომ მთელ მსოფლიოში არსებული უმძიმესი ეკონომიკური პრობლემების ფონზე საქართველოში შარშანაც და მიმდინარე წლის იანვარ-აპრილშიც 10%-ზე მაღალი ეკონომიკური ზრდა დაფიქსირდა.

საქართველოს "კეთილმოსურნეებს" შეიძლება არ მოსწონთ, რომ საქართველოში კანონი კანონობს და არაჟნის კონტეინერით ქვეყანაში შემოპარული სააკაშვილი და ტელეკომპანიის 7 მილიონით გამძარცველი გვარამიაც დღეს კუთვნილ ადგილას იმყოფებიან"- აღნიშნა მან. 

ირაკლი კობახიძეს თუ დავუჯერებთ, "საქართველოს "კეთილმოსურნეებს" შეიძლება არ მოსწონთ, რომ საქართველო სრულიად საბედისწერო და ფატალურ ომში არ ჩაერთო და ქვეყანა არავის გაანადგურებინა".

მისივე მტკიცებით, "რაც არ მოწონთ კრიმინალების მფარველებს, მოსწონს ქართველ ხალხს".