ჩვენი პოლიტიკა საქართველოს მთავრობის ქმედებებზე იქნება დამოკიდებული - ამის შესახებ  აშშ-ს სახელმწიფო დეპარტამენტის სპიკერმა, მეთიუ მილერმა 24 ივლისის გამართულ ბრიფინგზე განაცხადა. 

ჟურნალისტი ალექს რაუფოღლუ დაინტერესდა, აქვთ თუ არა ვაშინგტონში იმედი, რომ საქართველოს მთავრობა საკუთარ პოლიტიკას შეცვლის.

აშშ-ს სახელმწიფო დეპარტამენტის სპიკერმა ხაზგასმით აღნიშნა, რომ აშშ საქართველოს მთავრობის განსჯას მათი პოლიტიკის საფუძველზე აპირებს.

თუ გადახედავთ ნაბიჯებს, რომლებიც ჩვენ გადავდგით - ჩვენ ნათელი გავხადეთ, რომ საქართველოს მთავრობას მათ პოლიტიკურ გადაწყვეტილებებზე დაყრდნობით განვსჯიდით, რომ ჩვენი პოლიტიკური გადაწყვეტილებები დამოკიდებულია იმ ქმედებებზე, რომლებსაც ისინი იღებენ.

თქვენ ნახეთ, რომ სახელმწიფო მდივანმა დააანონსა ჩვენი საქართველოსთან ურთიერთობების გადახედვა. ნახეთ, რომ მან პირველი შეზღუდვები, პირველი სანქციები შემოიღო საქართველოს ოფიციალური პირების წინააღმდეგ. საქართველოსთან ურთიერთობების გადახედვა გრძელდება.

ჩვენ ყოველთვის იმედიანად ვართ, რომ ნებისმიერი ქვეყანა, რომელიც დემოკრატიული ზომებისკენ გზაზე უკუსვლას ან ევროატლანტიკურ ინტეგრაციაზე უკუსვლას იწყებს, თავის კურსს შეცვლის. განსაკუთრებით მაშინ, როდესაც ხედავ, რომ ასეთი ქვეყნის ხალხი ამბობს, რომ მათ სურთ კურსის ცვლილება. თუმცა, მაშინ როდესაც ჩვენ იმედი გვაქვს, რომ ისინი ცვლილებას განახორციელებენ, ჩვენ ჩვენს პოლიტიკურ გადაწყვეტილებებს ვავითარებთ ძალიან რეალური შესაძლებლობის გათვალისწინებით, რომ შეიძლება არ განახორციელონ ცვლილება და ამას ვაკეთებთ"- თქვა მილერმა.