ფაქტია, რომ ევროკავშირში ჩვენი გაწევრიანება დაპაუზებულია და ყველა ელოდება 26 ოქტომბრის არჩევნებს, როცა ხალხმა, ჩვენმა ამომრჩეველმა, უნდა თქვას საბოლოო სიტყვა, რა გვინდა- იზოლაცია და სიღატაკე თუ კეთილდღეობა და ევროპა, - ამის შესახებ “ერთიანი ნაციონალური მოძრაობის" გენერალურმა მდივანმა პეტრე ცისკარიშვილმა განაცხადა.

მისი თქმით, დასავლეთიდანაც არაერთხელ გაკეთდა განცხადებები საქართველოს საგარეო კურსის შეცვლის შესახებ.

ჟოზეფ ბორელის განცხადებამდე იყო მრავალი სხვა განცხადება ევროპის ქვეყნებიდან, ისევე როგორც შეერთებული შტატებიდან, რომ საქართველომ რუსული კანონის მიღების ფონზე კურსი შეცვალა, შემდეგ შეცვალა თავისი საგარეო ტრაექტორია და რომ შეჩერებულია, დაპაუზებულია ჩვენი ევროინტეგრაცია. ეს არის განცხადებები, რომლებიც პრაქტიკულად, მტკიცებულებებად უნდა იყოს გამოყენებულიყო საკონსტიტუციო სასამართლოში, იმიტომ რომ, თუ ჩვენ გვაინტერესებს, მიდის თუ არა საქართველო ევროპისკენ და რუსულმა კანონმა დააზიანა თუ არა ეს კურსი, მაშინ პირველ რიგში, ეს უნდა ვკითხოთ იმ ადამიანებს, ვინც ამ გადაწყვეტილებას იღებს - დაჯდეს მაგიდასთან და მოაწეროს ხელი, რომ საქართველო მიდის ევროკავშირისკენ, მიაღწია სტანდარტებს და აკმაყოფილებს მოთხოვნებს, რაც გაწევრიანებისთვის მოეთხოვება. 

ამ ადამიანების განცხადებები უფრო მნიშვნელოვანია თუ მოპასუხის, ანუ იუსტიციის სამინისტროს მხრიდან სიტყვებით ჟონგლიორობა, რომელსაც ჩვენ ვხედავთ საკონსტიტუციო სასამართლოში? ფაქტია, რომ ჩვენი ევროკავშირში გაწევრიანება დაპაუზებულია და ყველა ელოდება 26 ოქტომბრის არჩევნებს, როცა ხალხმა, ჩვენმა ამომრჩეველმა, უნდა თქვას საბოლოო სიტყვა, რა გვინდა ჩვენ? - იზოლაცია და სიღატაკე თუ კეთილდღეობა და ევროპა”, - განაცხადა პეტრე ცისკარიშვილმა.