რუსული ელექტრონული კომერციის პლატფორმა Ozon-მა საქართველოში ფუნქციონირება დაიწყო. მარკეტის ოფიციალურ ვებგვერდზე განთავსებული ინფორმაციის მიხედვით, მომხმარებელს შეუძლია შეკვეთილი საქონლის აღება როგორც საქართველოს დიდ ქალაქებში (თბილისი, ბათუმი, ქუთაისი, ფოთი, ზუგდიდი, რუსთავი), ასევე მცირე ქალაქებში, მათ შორის მაღალმთიანებში (ხაშური, ბორჯომი, ამბროლაური, ისინი, ოზურგეთი და სხვ.).

"ოზონმა" უკვე გამოაქვეყნა პრესრელიზი საქართველოში გაყიდვების დაწყების შესახებ.

მასში ნათქვამია, რომ „რესპუბლიკის მაცხოვრებლებს უკვე შეუძლიათ ბაზარზე სხვადასხვა კატეგორიის 50 მილიონზე მეტი საქონლის შეძენა - ელექტრონიკიდან დაწყებული სილამაზისა და ჯანმრთელობის პროდუქტებით დამთავრებული. მიწოდებას პირველ ეტაპზე დაახლოებით 14 დღე დასჭირდება და კლიენტებს შეეძლებათ შეკვეთის მიღება სახლთან ახლოს პარტნიორების შეკვეთების აღების პუნქტებში ან კურიერის მიწოდების გზით.

აღსანიშნავია, რომ "ოზონი" 2021 წლიდან ავითარებს ბიზნესს დსთ-ს ქვეყნებში. კომპანიას აქვს ბიზნეს და ლოგისტიკური ინფრასტრუქტურა ბელორუსში, სომხეთში, ყაზახეთში, ყირგიზეთსა და უზბეკეთში.

2022 წლის აპრილში კომპანია Ozon-ის გენერალურ დირექტორს, ალექსანდრე შულგინი ევროპული სანქციების სიაში მოხვდა, რის შემდეგაც ბიზნესმენმა ხელმძღვანელი თანამდებობა დატოვა. 2023 წლის სექტემბერში ცნობილი გახდა, რომ ევროკავშირის საერთო იურისდიქციის სასამართლომ ლუქსემბურგში მიიღო გადაწყვეტილება შულგინის წინააღმდეგ სანქციების გაუქმების შესახებ.

ცობილია ასევე, რომ "ozon"-ის დირექტორთა საბჭოშია რუსი ოლიგარქის ვლადიმერ ევტუშენკოვის შვილიც. 

ვინ არის ვლადიმერ ევტუშენკოვი?

აშშ-მა ევტუშენკოვის დაფუძნებული კომპანია "სისტემა" დაასანქცირა. ის იმ ასეულობით კომპანიას შორის მოხვდა, რომელსაც სანქციები უკრაინაში რუსეთის ომის გამო დაუწესდა. 

ამასთან, გასული წლის 25 აპრილს გავრცელდა აუდიოჩანაწერები, სადაც, სავარაუდოდ, ბიძინა ივანიშვილსა და ​სანქცირებულ რუს ოლიგარქს, ვლადიმერ ევტუშენკოვს შორის საუბარი ისმის.

ჩანაწერში, სავარაუდოდ, ევტუშენკოვი ივანიშვილს სთხოვს სანქციების გვერდის ავლით მოქმედებას, თუ მასაც აქვს ამის სურვილი.

ჩანაწერის გავრცელების შემდეგ უკრაინის უმაღლესი რადას ფრაქცია "ხალხის მსახურის" თავმჯდომარე დავით არახამიამ ევროკავშირსა და აშშ-ს მოუწოდა, ბიძინა ივანიშვილსა და მისი ბიზნესაქტივებისთვის სანქციების დაწესება განიხილონ.

მანამდე მედიაში გავრცელდა ინფორმაცია რუსული ბაზრის Wildberries-ის საქართველოში სამუშაოების დაწყების გეგმების შესახებ. ცნობილი გახდა,  რომ შეკვეთის აღების პუნქტი სატესტო რეჟიმში მუშაობდა, მაგრამ პლატფორმას საქართველოში ოფიციალურად მუშაობა არ დაუწყია.