ამ წუთებში თბილისის საქალაქო სასამართლოში მიხეილ სააკაშვილის პროცესი მიმდინარეობს - საქართველოს მესამე პრეზიდენტს მოსამართლის წინაშე კითხვებს შვიდი ნოემბრის საქმესთან დაკავშირებით უსვამენ. 

"ვივა მედის" პალატიდან სასამართლო სხდომაზე დისტანციურად ჩართული სააკაშვილი გორში, "ქართული ოცნების" საპატიო თავმჯდომარის მიერ ოსი "და-ძმებისთვის" დაანონსებულ ბოდიშს გამოეხმაურა და თქვა, რომ საქართველო ბოდიშს არასდროს მოიხდის.

საქართველოს ყოფილი პრეზიდენტის განცხადებით, ის, რაც "ოცნებამ" ბოდიშის მოხდის თემით გააკეთა, რუსეთისადმი პირდაპირი ჩაბარებაა.

[ფაილის] ამის მიღმა მოგმართოთ და მოვიხადო ბოდიში ბაობაბების გახმობისთვის, ერის და ბერის წინაშე? ეს ხუმრობით და სინამდვილეში, [ფაილის] ამის მიღმა რომ არ იარო შენს ხალხთან, ამას უნდა დამსახურება. იმიტომ, რომ მე მაქვს გამოცდილება თუ რას ნიშნავს შენს ხალხთან სიარული. აი, ფოტოები, ხალხის ნაკადში ყოფნა, აი, ხალხის ემოციები. ეს კაცი თვითონ ჩაიკეტა გალიაში და მეც ჩამკეტა გალიაში. მან კარგად იცის რამხელა მხარდაჭერა მაქვს, როგორ მიყვარს ჩემი ხალხი და როგორ ვუყვარვარ ჩემს ხალხს. თვითონ არის გალიაში ჩაკეტილი იმიტომ, რომ ძალიან კარგად იცის თუ როგორ ეზიზღებათ, ეს იცის. ამ ზიზღსაც დამსახურება უნდოდა და სიყვარულსაც, რომელიც ჩვენ მოვიპოვეთ დამსახურება უნდა.

დღეს აქტუალურია ბოდიშების მოხდა. საქართველო არასდროს არ მოიხდის ბოდიშს! დღევანდელ მსოფლიოში სისუსტისა და ბოდიშების მოხდის დრო არ არის! დღეს არის სიძლიერის და საკუთარი სიმართლის გატანის დრო. მე არ მოვიხდი ბოდიშის იმისთვის, რომ დღევანდელი ახალგაზრდები 15-20-30 ათას დოლარს არ იხდიან, ერთიან ეროვნულ გამოცდებს აბარებენ და „ბლატის“ გარეშე ხვდებიან უმაღლეს სასწავლებლებში; მე არ მოვიხდი ბოდიშს „გაი“ რომ გავაუქმე, რომელიც აწამებდა ჩვენს ხალხს და ახალი პოლიცია და პატრული შევქმენით; მე არ მოვიხდი ბოდიშს იმისთვის, რომ ნულიდან შევქმენით ქართული ჯარი, რომელსაც ამცირებენ და ავიწროებენ; არ მოვიხდი ბოდიშს იმისთვის, რომ ჩაბნელებულ ქვეყანაში დავაბრუნეთ სინათლე; არ მოვიხდი ბოდიშს იმისთვის, რომ ქუთაისში პარლამენტი გადავიტანეთ; არ მოვიხდი ბოდიშს იმისთვის, რომ აჭარის სეპარატიზმი გავაუქმეთ. აჭარა, ჯავახეთი დავუბრუნეთ საქართველოს; არ მოვიხდი ბოდიშს იმისთვის, რომ ბათუმი - სასწაული შევქმენით; არ მოვიხდი ბოდიშს სანდრამ რომ გააკეთა სკრინინგის პროგრამა, უამრავი ახალი საავადმყოფო ავაშენეთ; არ მოვიხდი ბოდიშს იმისთვის, რომ კრიმინალი მოვსპე, კორუფცია აღმოფხვერი; არასდროს არ მოვიხდი ამ ყველაფრისთვის ბოდიშს! მასამართლებენ სწორედ იმიტომ, რომ ეს ყველაფერი შევძელით, არაფერ შუაშია ეს შეთითხნილი საქმეები. ის, რაც ახლა ბოდიშის მოხდის თემით გაგვიკეთეს, პირდაპირი ჩაბარებაა რუსეთისადმი. მე არ მოვიხდი ბოდიშს იმისთვის, რომ ქართულ ეკლესიასთან კონკორდატი მოვამზადე და პატრიარქთან ერთად ამას ხელი მოვაწერე. როცა გვეუბნებიან, რომ ბოდიში უნდა მოვიხადოთ, იქნებ ბოდიში უნდა მოვუხადოთ ჯალალ - ედ - დინს, აღა - მაჰმად - ხანს, შაჰ აბასს, ყველას, ვინც საქართველოს ანადგურებდა ბოდიში უნდა მოვუხადოთ?! როგორ გაბედეს ქართველებმა და როგორ მოაწყვეს მაგალითად, ბახტრიონის აჯანყება?! ეს პროვოკაცია იყო! დიდგორი - ეს იყო ყველაზე დიდი პროვოკაცია საქართველოს ისტორიაში. საქართველოს ჰყოლია სუსტი მმართველები, მაგრამ ისტორიაში არასდროს ჰყოლია მოღალატე მმართველები“,- განაცხადა მიხეილ სააკაშვილმა.

"ქართული ოცნების" საპატიო თავმჯდომარემ, ბიძინა ივანიშვილმა გორში, "ქართული ოცნების" ყრილობაზე სიტყვით გამოსვლის დროს 2008 წლის რუსეთ-საქართველოს ომის დაწყებაში ქართული მხარე დაადანაშაულა. 

"გამოვნახავთ ძალას ბოდიში მოვიხადოთ იმის გამო, რომ ენმ-მ ალში გახვია ოსი დები-ძმები"- თქვა მმართველი პარტიის სიის პირველმა ნომერმა აგვისტოს ომზე საუბრისას.