პრემიერი-მინისტრი, ირაკლი ღარიბაშვილი, სუს-იდან გამოჟნილ საიდუმლო მასალებს სიცრუესა და ცილისწამებას უწოდებს. მისი თქმით, ამის მიზანი მთავრობასა და ეკლესიას შორის უთანხმების ჩამოგდებაა. 

პრემიერი ასევე ამბობს, რომ "ქართული ოცნება" ყველაზე ჰუმანური ხელისუფლებაა, რომელმაც ქართველ ხალხს სიმშვიდე და სტაბილურობა მოუტანა. მთავრობის მეთაურის თქმით, 2 ოქტომბრის არჩევნებში "ქართული ოცნება"  ყველა ქალაქსა და მუნიციპალიტეტში გაიმარჯვებს, რადგან მმართველ პარტიას ალტერნატივა არ ჰყავს. 

გუშინ გავრცელდა მორიგი ცილისწამება და სიცრუეზე დაფუძნებული გარკვეული მასალები, დოკუმენტაცია, რომლითაც, მათი მიზანი და ამოცანაა, რომ რაღაც გარკვეული უთანხმოება ჩამოვარდეს მთავრობასა და ეკლესიას შორის. ამ დროს, ყველამ კარგად იცის, რომ არ ყოფილა ასეთი ერთობა, როგორიც არის დღეს მთავრობასა და ეკლესიას შორის და რატომ? ჩვენ არ ვიძახით, უნაკლონი ვართ, რა თქმა უნდა, ჩვენ შეცდომები მოგვსვლია და კიდევ მოგვივა, მაგრამ ყველაფერი შედარებითია, ჩვენ ჩვენი საქმით დავამტკიცეთ, რომ ვართ ყველაზე ჰუმანური ხელისუფლება, ჩვენი გამოწვევებით, ჩვენი შეცდომებით, ხარვეზებით, მაგრამ მივდივართ წინ. ჩვენმა ხელისუფლებამ მოიტანა უპრეცედენტო, უწყვეტი მშვიდობა და სტაბილურობა. ვინ, თუ არა ქართველებმა, ძალიან კარგად ვიცით მშვიდობის ფასი, ვიცით ომის ფასი, ვიცით გმირობის ფასი, ერთგულების ფასი, სამშობლოს სიყვარულის ფასი, მაგრამ გვინახავს ღალატიც, შიშიც და ლაჩრობის ძალიან ბევრი მაგალითიც. ხალხი ბრძენია და ყველაფერს ხედავს, ხალხი აკეთებს სწორ არჩევანს, შემთხვევითი არ არის, რომ შვიდ არჩევნებში "ქართული ოცნება" იმარჯვებს და კვლავაც, მერვე არჩევნებში გაიმარჯვებს იმიტომ, რომ "ქართულ ოცნებას" ალტერნატივა არ ჰყავს დღეს ქვეყანაში.

2 ოქტომბერს გავიმარჯვებთ ყველგან, ყველა ქალაქში, ყველა მუნიციპალიტეტში ჩვენი ხალხის მხარდაჭერით და ქვეყანა გააგრძელებს სტაბილურ მშვიდობიან განვითარებას, - აღნიშნა პრემიერმა.