"პირველების" ინფორმაციით, ბათუმში, ე.წ. ოცნების ქალაქში ორი არასრულწლოვანი თხრილში ჩავარდა და დაიღუპა. 

5 და 7 წლის ბავშვებს ბოლო 4 საათის განმავლობაში ეძებდნენ, ისინი  სწორედ თხრილში იპოვეს. 

ამ დროისთვის არსებული არსებული ინფორმაციით, თხრილში წყალი იდგა, მოზარდებმა იქიდან ამოსვლა ვერ შეძლეს და ორივე მათგანი დაიხრჩო.

ადგილზე პოლიციაა მობილიზებული. 

2 მოზარდის გარდაცვალება დაადასტურა ბათუმის მერიამაც. 

უბედური შემთხვევა მოხდა ქალაქ ბათუმში, ფრ. ხალვაშის გამზირის #188-ის მიმდებარედ. წყლით სავსე თხრილში ორი არასრულწლოვანი ჩავარდა, საუბედუროდ, მათი გადარჩენა ვერ მოხერხდა. 
სამძიმარს და თანადგომას ვუცხადებთ გარდაცვლილთა ოჯახებს ტრაგედიის ამ მძიმე წუთებში. მომხდარის დეტალებს დაადგენს აჭარის პოლიციის დეპარტამენტი დაწყებული გამოძიების ფარგლებში"- წერია განცხადებაში. 

ადგილობრივების თქმით, ე.წ. ბარაკების მიმდებარედ, სამშენებლო სამუშაოები რამდენიმე დღის წინ დაიწყო, ადგილზე ერთი კვირის წინ "ქართული ოცნების" პრემიერ-მინისტრი ირაკლი კობახიძე იმყოფებოდა და „ოცნების ქალაქის“ პროექტის დაწყება დააანონსა. 

მან მშენებლობის საფუძვლის ჩაყრასთან დაკავშირებით სიმბოლური კაფსულის ჩაგდების ცერემონიაში მიიღო მონაწილეობა. 

8 თებერვალს გამართულ ღონისძიებაში აჭარის მთავრობის თავმჯდომარე თორნიკე რიჟვაძეც იღებდა მონაწილეობას.

• რადიო თავისუფლების მიერ გავრცელებული ინფორმაციით, ამ დღისთვის აჭარის ავტონომიური რესპუბლიკის ფინანსთა და ეკონომიკის სამინისტრომ დაიქირავა კომპანია „არტ ბიურო“, რომელმაც მოაწყო სცენა და სივრცე მიწვეული სტუმრებისთვის. ღონისძიება 209 165 ლარი დაჯდა - აქედან მშენებლობის დაწყებისთვის საძირკველში სიმბოლურად ჩადებული კაფსულის ფასი 1770 ლარია.
•  „ოცნების ქალაქში“ სამი 12-სართულიანი კორპუსის მშენებლობა „ქართული ოცნების“ ხელისუფლებამ 2020 წლის თებერვალში დაიწყო. საცხოვრებელი ფართები 582 ოჯახისთვის იყო გათვალისწინებული.
• გამოცემის ცნობით, მეორე ეტაპზე 9 მრავალსართულიანი კორპუსის აშენება იგეგმება. პროექტი, რომელიც 36 თვეში უნდა დასრულდეს, 1077 ბინაზეა გათვლილი.

ადგილობრივები "ტვ პირველთან" აღნიშნავენ, რომ ადგილზე გამაფრთხილებელი ნიშნები არ არის დამონტაჟებული. 

• შეგახსენებთ, თბილისში, დედაქალაქის ცენტრში, „რიყის დოქებთან“ მეათეკლასელი იოსებ ადეიშვილის დაღუპვის შესახებ ინფორმაცია "ტვ პირველმა"  29 იანვარს გაავრცელა. ამ დრომდე არავის უთქვამს, ვინ არის მოზარდის დაღუპვაზე პასუხისმგებელი.