თავდასხმა სკოლის მოსწავლეებზე, გორის ცენტრში, საფეხბურთო მოედანზე მოხდა. 13 და 15 წლის ძმებს ჯგუფურად იმის გამო გაუსწორდნენ, რომ ისინი ქურდულ სამყაროს პატივს არ სცემდნენ. არასრუწლოვნების გარჩევაში 15-მდე პირი მონაწილეობდა, თუმცა გამოძიებას ამ დროისთვის დაკავებული მხოლოდ ერთი, 16 წლის სკოლის მოსწავლე ჰყავს.

სასტიკად ძმები იმის გამო სცემეს, რომ თითქოს მათ ტიკ ტოკზე ერთ-ერთი ვიდეოს კომენტირებისას არ გამოხატეს სათანადო პატივისცემა კანონიერი ქურდის მიმართ. 

ახლა მთავარი კითხვაა, ვისი დავალებით მოქმედებდნენ არასრულწლოვნები, როცა თანატოლებს ტიკ-ტოკში დაწერილი კომენტარის გამო სასტიკად უსწორდებოდნენ. არსებობს ვერსია, რომ დავალება ე.წ უბნის მაყურებლებმა გასცეს. 

"პირველების" მოპოვებული ინფორმაცით, სკოლის მოსწავლეებს წიხლებს და ხელებს ურტყამდნენ სახეში და თავში. ფიზიკურ ანგარიშსწორებას ერთ-ერთი თავდამსხმელი ტელეფონით იღებდა, სწორედ ამ ჩანაწერში ისმის, როგორ შეეშინდათ დაჯგუფების წევრებს, რომ უმძიმესი დაზიანებების მიყენებით ერთ-ერთ ძმას მხედველობა არ დაეკარგა.

ეს ჩანაწერი, წესით, უკვე უნდა ჰქონდეს საქმეში ჩადებული შინაგან საქმეთა სამინისტროს.

ვრცლად ნახეთ ლიზა ლასარეიშვილის რეპორტაჟში.