კოალიცია “ცვლილებისთვის “ლიდერი, ნიკა გვარამია, რომელიც რუსთავის ციხისკენ მიემართება, სოციალურ ქსელში კიდევ ერთ გზავნილს აქვეყნებს.

არც ერთი ნაბიჯი უკან! ჩვენს უკან ჩვენი სამშობლოა!

ოლიგარქია უნდა დაემხოს!

დიდება საქართველოს!,-წერს ის.

ცოტა ხნის წინ, სასამართლომ ნიკა გვარამიას აღკვეთის ღონისძიების სახით პატიმრობა შეუფარდა - გადაწყვეტილება მოსამართლე ჯვებე ნაჭყებიამ გამოაცხადა. 

დღევანდელ სხდომაზე პროკურატურამ გვარამიას მიმართ შეფარდებული აღკვეთის ღონისძიების - 30 000-ლარიანი გირაოს პატიმრობით შეცვლის შუამდგომლობა დააყენა.

სხდომას არ ესწრებოდა ნიკა გვარამია. როგორც ცნობილია, ის რუსთავის მე-12 პენიტენციური დაწესებულებისკენ მიემართება.

ცნობისთვის, თეა წულუკიანის კომისიაზე არ გამოცხადების გამო, ნიკა გვარამიას აღკვეთის ღონისძიების სახით 30 000-ლარიანი გირაო შეუფარდეს. კოალიცია "ცვლილებისთვის" ლიდერს გირაოს გადასახდელად 50-დღიანი ვადა განესაზღვრა, რომელსაც ვადა 7 ივნისს ამოეწურა. ოპოზიციონერმა პოლიტიკოსმა გირაო არ გადაიხადა.