ბათუმში, 26 მაისის ქუჩაზე, კორპუსის ნგრევის საქმეზე ბრალდებულ 3 ადამიანს აღკვეთის ღონისძიების სახით პატიმრობა შეეფარდა. 

"არაფერი არ გამომიღია, მაბრალებენ ყველაფერს, არ გამომიღია, მაბრალებენ" - განაცხადა ერთ-ერთმა დაკავებულმა სასამართლო პროცესზე. 

საქართველოს პროკურატურამ კორპუსის ჩამონგრევის საქმეზე დაკავებულ პირველი სართულის ბინის მეპატრონესა და ორ მუშას ბრალდება გუშინ წარუდგინა. 

ბათუმში კორპუსის ჩამონგრევის შედეგად სულ  9 ადამიანია გარდაცვლილი, ამ დრომდე მძიმეა ნანგრევებიდან ამოყვანილი 37 წლის კაცის მდგომარეობა.  გარდაცვლილებს შორის 3 არასრულწლოვანია.

კორპუსი ბათუმში, 8 ოქტომბერს ჩამოინგრა. საქმის მასალების მიხედვით, გამოძიებით დაადგინა, რომ საცხოვრებელი კორპუსის ერთი სადარბაზოს ჩამონგრევა პირველ სართულზე სამშენებლო-სარემონტო სამუშაოების უსაფრთხოების წესების უხეში დარღვევით წარმოებამ გამოიწვია.

უმძიმესი ტრაგედიის გამო საქართველოში 11 ოქტომბერი გლოვის დღედ გამოცხადდა.