თბილისის საქალაქო სასამართლოში სინდისის 8 პატიმრის სასამართლო პროცესი მიმდინარეობს. დღევანდელ სხდომაზე დაცვის მხარის მტკიცებულებების გამოკვლევა უნდა მომხდარიყო, კერძოდ, სასამართლო პროცესზე ადვოკატ გუჯა ავსაჯანიშვილის მიერ მოყვანილ მოწმეებს ჩვენება უნდა მიეცათ, თუმცა ბრალდების მხარემ აღნიშნული მოწმეების მიერ მიცემული ჩვენებების უდავოდ ცნობა მოითხოვა, რაც მოსამართლემ დააკმაყოფილა.

ასევე, ბრალდებულების თორნიკე გოშაძისა და ირაკლი მიმინოშვილის ადვოკატმა, ნინო ლომინაძემ შუამდგომლობა დააყენა, რომ სისხლის სამართლის საქმეში ლევან სამხარაულის ექსპერტიზის დასკვნაც დამატებულიყო და დასაკითხ პირთა სიაში 2 პირის დამატება მომხდარიყო.

ბრალდების მხარემ, ადვოკატების მიერ ექსპერტიზის დასკვნები უდაოდ ცნო, რის შემდეგაც მოსამართლემ აღნიშნული შუამდგომლობა დააკმაყოფილა.

ამასთან, სასამართლოზე გაჟღერდა ინფორმაცია, რომ ბრალდებულები ჩვენებას არ მისცემენ და საბოლოო სიტყვის უფლებით ისარგებლებენ.

• დაკავებული 8 პირიდან სამს - ზვიად ცეცხლაძეს, ვეფხია კასრაძესა და ვასილ კაძელაშვილს ჯგუფური ძალადობის ორგანიზებასა და ხელმძღვანელობას ედავებიან. მათ 6-დან 9-წლამდე თავისუფლების აღკვეთა ემუქრებათ.
• ბრალდებულებიდან ხუთს - გიორგი გორგაძეს, ირაკლი მიმინოშვილს, ინსაფ ალიევს, თორნიკე გოშაძეს და ნიკოლოზ ჯავახიშვილს ჯგუფურ ძალადობაში მონაწილეობას ედავებიან. მათ 4-დან 6-წლამდე თავისუფლების აღკვეთა ემუქრებათ.