"ანასტასია ზინოვკინას მდგომარეობა დამძიმდა" - ამის შესახებ ინფორმაციას სამოქალაქო აქტივისტი, ნათია გაბრავა სოციალურ ქსელში ავრცელებს. 

როგორც პოსტშია აღნიშნული, სინდისის პატიმარს ზურგის პრობლემა აქვს, მას რეგულარულად აძლევენ ტკივილგამაყუჩებლებს, მაგრამ რეალურ მკურნალობას არ იღებს.

პროევროპული აქციების მიმდინარეობისას დაკავებულ ქალს, გუშინ, ზურგი ისე დაეჭიმა, რომ ადგომა ვერ შეძლო - "ის რვა საათის განმავლობაში ყვიროდა და ითხოვდა დახმარებას, მაგრამ არავინ შევიდა".

სამოქალაქო აქტივისტის ინფორმაციით, ანასტასია ზინოვკინას სასწრაფო სამედიცინო დახმარება და საერთაშორისო რეაგირება სჭირდება.

გაფრთხილება: პოსტი შეიცავს ადამიანურ ღირსებაზე დამამცირებელი მოპყრობის დეტალებს.

პოლიტპატიმარმა ანასტასია ზინოვკინამ, რომელიც რუსეთშია დაბადებული და ამჟამად იმყოფება რუსთავის №5 ციხეში, დღეს დარეკა.

მან აღწერა, როგორ წამოიწყეს მის მიმართ ცინიკური და სასტიკი მოპყრობა გუშინ.

ანასტასიას აქვს სერიოზული ზურგის პრობლემა. მას რეგულარულად აძლევენ ტკივილგამაყუჩებლებს, მაგრამ რეალურ მკურნალობას არ იღებს.

ის ითხოვდა ორთოპედიულ მატრასსა და ბალიშს — თავიდან დაჰპირდნენ, შემდეგ უარი უთხრეს.

გუშინ მისი მდგომარეობა დამძიმდა.

დილით ექიმმა გაუკეთა ნემსი.

12:30-ზე ზურგი ისე დაეჭიმა, რომ აღარ შეეძლო ადგომა ან მოძრაობა.

ის რვა საათის განმავლობაში ყვიროდა და ითხოვდა დახმარებას, მაგრამ არავინ შევიდა.

ანასტასია იმყოფება ერთადგილიან საკანში, რაც ნიშნავს, რომ არავინ ჰყავდა, ვინც დაეხმარებოდა.

დამტვრეულმა დარაჯებმა მხოლოდ სარკმლიდან უთხრეს, რომ ვერაფერს უზამენ.

გუშინ იყო აბაზანის დღე — დარაჯებმა ჩაწერეს, თითქოს ის „აბაზანაზე თვითონ უარს ამბობდა.“ რეალურად კი მას უბრალოდ ვერ შეეძლო ადგომა.

ის რვა საათის განმავლობაში იწვა იატაკზე, ვერც ტუალეტამდე მივიდა.

21:00 საათზე შევიდა მედდა, პამპერსი ესროლა და წავიდა.

ანასტასიამ სცადა ადგომა, რომ აეცვა, მაგრამ დავარდა იატაკზე და შუაღამემდე ასე იწვა.

00:00-ზე შევიდნენ თანამშრომლები და დააწვინეს საწოლზე.

დოკუმენტში ჩაწერეს, რომ „ღამის გადათვლაზე გაურკვეველი მიზეზით არ გამოცხადდა.“

დილით 6 საათზე ანასტასიამ შეძლო ტუალეტამდე მიძრომა, დაკუწული ქსოვილით თვითონ მოიმზადა კორსეტი, და დარეკა, რათა ეს ყველაფერი მოეყოლა.

10 საათზე ისევ ის ექიმი მივიდა და თქვა, რომ საჭიროა ნევროლოგი, მაგრამ ერთადერთი, რაც შეეძლო შეთავაზება, იყო უფრო ძლიერი ტკივილგამაყუჩებელი, რომლის მიცემაც უნდა დაეთანხმოს ფსიქიატრს.

ამის შემდეგ ზარი შეწყდა.

ეს აღარ არის უყურადღებობა — ეს არის წამება.

ანასტასია ზინოვკინას სჭირდება სასწრაფო სამედიცინო დახმარება და საერთაშორისო რეაგირება," - ნათქვამია პოსტში. 

ცნობისთვის, აქციების დროს ნარკოდანაშაულის ბრალდებით დაკავებულ ანასტასია ზინოვკინასა და არტებ გრიბულს 8 წლითა და 6 თვით პატიმრობა მიესჯათ.

რუსეთის მოქალაქეები ანასტასია ზინოვკინა და არტემ გრიბული 2023 წლის 17 დეკემბერს თბილისში დააკავეს. პროკურატურა მათ 16 გრამი ნარკოტიკული ნივთიერების ფლობას ედავებოდა, რასაც ბრალდებულები უარყოფდნენ და აცხადებდნენ, რომ ნარკოტიკი ჩაუდეს.

მათი თქმით, დაკავება აქციაში მონაწილეობის გამო მოხდა - ზინოვკინა იმასაც ამბობდა, რომ პოლიციელები მას სექსუალური ძალადობით ემუქრებოდნენ და სექსუალურად შეავიწროვეს.