სადამკვირვებლო ორგანიზაცია „სამართლიანი არჩევნების“ (ISFED-ის) ყოფილ აღმასრულებელ დირექტორს, ნინო დოლიძეს აშშ-ის ეროვნულ-დემოკრატიული ინსტიტუტის მიერ დაწესებული ჯილდო, მედლინ ოლბრაიტის სახელობის დემოკრატიის ჯილდო გადაეცემა.

NDI - ის მიერ გავრცელებული ინფორმაციის თანახმად, ნინო დოლიძეს ჯილდო გადაეცემა „გამორჩეული ლიდერობისა და ერთგულებისათვის არჩევნების სანდოობის დაცვისა და დემოკრატიული მონაწილეობის გაძლიერების მიმართ“.

ჯილდო მასთან ერთად გადაეცემა მალავურ სადამკვირვებლო ორგანიზაცია Chisankho Watch-ს. დაჯილდოების ცერემონია 3 დეკემბერს, NDI-ის „დემოკრატიის დღეს“, აშშ-ის დედაქალაქ ვაშინგტონში გაიმართება.

ოლბრაიტის სახელობის ჯილდო სხვადასხვა დროს მიღებული აქვთ:

• ვლადიმირ კარა-მურზას - რუს ოპოზიციონერს, ყოფილ პოლიტიკურ პატიმარს, რომელიც სამშობლოში დევნილია და ემიგრაციაში ცხოვრობს;
• ფილიპინურ მედია Rappler-ს - ნობელიანტ მარია რესას დაფუძნებულ ორგანიზაციას;
• სამხრეთაფრიკელ სასულიერო მოღვაწესა და აქტივისტს, დეზმონდ ტუტუს;
• აშშ-ის 39-ე პრეზიდენტ ჯიმი კარტერს;
• დისიდენტობის სიმბოლოს, ჩეხეთის პირველ პრეზიდენტ ვაცლავ ჰაველს.