შინაგან საქმეთა სამინისტროს განცხადებით, "სპარის" თანამშრომლებზე ჯგუფური თავდასხმის საქმის ფარგლებში, მამუკა ჩარკვიანის შვილის, ჯაკო (ჯანსუღ) ჩარკვიანის სავარაუდოდ უკანონოდ შენახული ცეცხლსასროლი იარაღები და საბრძოლო მასალა  ამოიღეს. 

გეკა გელაძის უწყების ცნობით,  2 ავტომატური ცეცხლსასროლი თოფი და 110 ვაზნა ამოიღეს. 

• სუპერმარკეტ „სპარის“ ორი თანამშრომლის მიმართ განხორციელებულ ჯგუფურ ძალადობაში მონაწილეებიდან ერთ-ერთი ჯაკო (ჯანსუღ) ჩარკვიანი პოლიციას გუშინ ჩაბარდა.
• აღნიშნულ საქმეზე შსს-მ, დღეს, კიდევ სამი პირი დააკავა. 
• სისხლის სამართლის საქმეზე, უკვე დაკავებულია მანანა გიორგობიანი.

სამართალდამცველების მიერ ჩატარებული საგამოძიებო მოქმედებების შედეგად, ერთ-ერთი დაკავებულის ჯ.ჩ.-ს მიერ სავარაუდოდ უკანონოდ შენახული ცეცხლსასროლი იარაღები და საბრძოლო მასალა ნივთმტკიცებადაა ამოღებული. მათ შორის: 2 ავტომატური ცეცხლსასროლი იარაღი, გლუვლულიანი თოფი და სხვადასხვა ტიპის ცეცხლსასროლი იარაღისთვის განკუთვნილი 110 ვაზნა," - წერია განცხადებაში. 

2 ნოემბერს, გვიან ღამით, სუპერმარკეტ "სპარში" ორ თანამშრომელს ფიზიკურად გაუსწორდნენ. სამართალდამცავებმა ჯგუფური ძალადობის ორგანიზებისა და მასში მონაწილეობის ფაქტზე "ქართული ოცნების" მხარდამჭერი, მანჩო გიორგობიანი დააკავეს.

შსს-ს ცნობით, მანანა გიორგობიანი დაუკავშირდა ჯაკო ჯანსუღ ჩარკვიანს, რომელიც ადგილზე თანმხლებ პირებთან ერთად მივიდა, რა დროსაც მათ, სუპერმარკეტის ორი თანამშრომელი ძალის გამოყენებით გაიყვანეს გარე ტერიტორიაზე და ჯგუფურად ფიზიკურად გაუსწორდნენ.