ქარტია: სასამართლოებში მედიის მუშაობის შეზღუდვებმა მძიმე მდგომარეობა შექმნა
ჟურნალისტური ეთიკის ქარტია იუსტიციის უმაღლეს საბჭოს მოუწოდებს, სასამართლოებში ჟურნალისტებისთვის ნორმალური სამუშაო პირობები უზრუნველყოს. ამის შესახებ მათ მიერ გავრცელებულ განცხადებაშია ნათქვამი.
ამასთან, ქარტია ხაზგასმით აღნიშნავს, რომ მედიის საქმიანობის ასეთი შეზღუდვა მნიშვნელოვნად აზიანებს საზოგადოების უფლებას, დროულად და სრულფასოვნად მიიღოს ინფორმაცია სასამართლო პროცესების შესახებ. ორგანიზაციის შეფასებით, მოქმედი პრაქტიკა არა მხოლოდ ჟურნალისტების პროფესიულ საქმიანობას უშლის ხელს, არამედ ამცირებს სასამართლო სისტემის გამჭვირვალობასა და ანგარიშვალდებულებას.
2025 წლის ივნისში „საერთო სასამართლოების შესახებ“ კანონში შესული ცვლილებებით, მედიასაშუალებებს აეკრძალათ ფოტო, კინო და ვიდეოგადაღება, ტრანსლაცია და აუდიოჩაწერა არა მხოლოდ სასამართლო სხდომათა დარბაზებში, არამედ სასამართლოების შენობებსა და ეზოებშიც.
ამ დროიდან მოყოლებული, მედიის წარმომადგენლები საათობით დგანან თბილისის საქალაქო სასამართლოს შესასვლელთან, სადაც ჟურნალისტებს ინტერვიუს ჩასაწერად გამოჰყავთ რეპონდენტები - ადვოკატები და პროკურორები, სასამართლო პროცესთან შემხებლობაში მყოფი სხვა პირები.
გაუმართლებელმა და დაუსაბუთებელმა შეზღუდვებმა უკიდურესად დაამძიმა მედიის მდგომარეობა სასამართლოებში. ჟურნალისტებსა და ოპერატორებს სასამართლოებიდან საზოგადოებამდე ინფორმაციის მისატანად წარმოუდგენელი ძალისხმევის გაღება უწევთ. შეუფასებელია მათი ერთგულება პროფესიის მიმართ და მათი თავდადება საზოგადოებრივი ინტერესისათვის.
თბილისის საქალაქო სასამართლომ არ იზრუნა ჟურნალისტებისა და ოპერატორებისთვის ელემენტარული სამუშაო პიროებების შექმნაზეც კი. მათ ღია ცის ქვეშ უწევთ მუშაობა პაპანაქება მზეში თუ აუტანელ ყინვაში, წვიმასა და ქარში.
ჟურნალისტური ეთიკის ქარტია “ქართული ოცნების” პარლამენტისგან მოითხოვს, გააუქმოს სასამართლოში მედიის მუშაობის შემზღუდავი ახლად მიღებული ნორმები, ხოლო პარალელურად, იუსტიციის უმაღლეს საბჭოს მოუწოდებს, მედიის წარმომადგენლებისათვის სასამართლოებში ჰუმანური სამუშაო პირობები უზრუნველყოს. ჟურნალისტებმა და ოპერატორებმა უნდა შეძლონ სასამართლოსთან დაკავშირებული ამბების გაშუქება ისე, რომ ამით რისკის ქვეშ არ დააყენონ თავიანთი ჯანმრთელობა და სიცოცხლე, - ნათქვამია განცხადებაში.
